ABŞ-ın keçmiş prezidenti Riçard Niksonla SSRİ rəhbəri olmuş Leonid Brejnev arasında 340 saatlıq səs yazısı olan qeyd ictimaiyyətə açıqlanıb. Modern.az-ın məlumatına görə ABŞ Milli Arxiv İdarəsi və Qeydiyyat İdarəsi tərəfindən açıqlanan məlumatlarda qeyd olunur ki, hər iki lider Vaşinqtonda bir araya gəlib. Görüş zamanı batil inanclar, siqareti buraxmaq mövzusundakı müzakirələr diqqəti cəlb edir. Niksonun gizli qeyd sistemi ilə yazılan danışıqların 18 iyun 1973-cü il stenoqramında iki rəhbərin dünya sülhü, ikitərəfli əməkdaşlıq və ailələri haqqında söhbətləri diskussiya obyektinə çevrilib. Çıxışın bir hissəsində ABŞ prezidentinin Brejnevə soyuq müharibəyə son qoymaq üçün etdiyi təklif də diqqətdən yayınmır.
“Düşünürəm ki, bizim şəxsi əlaqələrimiz iki ölkə arasındakı münasibətlərin inkişaf etməsi üçün lazımı qapıları açacaq və bu dünya sülhünə bir qatqı verəcək”-deyə Nikson Brejnevə deyir. ABŞ prezidenti həmçinin “İkimiz də çox güclü dövlətlərin ayrı-ayrılıqda rəhbəriyik. Bizim nə qədər fərqli siyasi sistemimiz olsa da, mümkün olduğu qədər birlikdə çalışmalıyıq”-deyə Nikson Brejnevə əməkdaşlıq təklif edir.
Çıxışın son hissəsində isə müzakirələr fərqli məcraya yönəlir. Belə ki, Niksonun SSRİ-yə səfəri və Moskvada 1974-cü ildə keçirilməsi düşünülən sammitin planları barədə söz açılır.
Aqşin Kərimov
