“Milli Şuranın Azərbaycan xalqının mənafeyinə uyğun heç bir perspektivi yoxdur. Milli Şura Rusiyanın proyekti idi. Kreml bu plandan iki cür istifadə edə bilərdi. Birincisi Azərbaycandan Milli Şuraya ciddi dəstək verməklə Suriyadakı kimi vətəndaş müharibəsinə cəhd edə bilərdi. İkincisi isə Milli Şuranı seçkilərdən kənarda saxlayıb hakimiyyətlə dil tapa bilərdi”. Bunu Modern.az-a açıqlamasında ADP sədri Sərdar Cəlaloğlu Milli Şuranın əvvəlki və gələcək perspektivini şərh edərkən deyib. Onun sözlərinə görə, Milli Şura hakimiyyətlə Rusiya arasındakı münasibətlərin zorakı və ya dinc yolla həll edilməsində bir vasitə olub. O bildirib ki, əvvəlcədən R.İbrahimbəyovun heç seçkidə iştirak etmək niyyəti olmayıb.
ADP sədri düşünür ki, Ziyalılar Forumu, Milli Şura və “Milyarderlər İttifaqı” bir proyektin ayrı-ayrı elementləridir. S. Cəlaloğlu qeyd edib ki, Milli Şuraya təsadüfi və müəyyən vətənpərvər kəsimi təmsil edən şəxsləri cəlb etməklə bu təşkilatın xalqın sifarişi ilə yaradıldığına dair bir görüntü yaradıblar.
“Demokratik qaydada yaranmayan, gücünü haqdan almayan, əsası olmayan bir qurumdan hansı perspektiv gözləmək olar?! Milli Şura öz fəaliyyətini keçirdiyi mitinqlə müəyyənləşdirdi”.
S.Cəlaloğlu Milli Şuranın 18 avqust tarixli aksiyasını müxalifətin 2003-cü ildəki mitinqi ilə müqayisə apararaq, dominantlığın ikincidə olduğunu vurğulayıb.
“150 minlik mitinq hara, 600-700 nəfərlik bir piket hara”. ADP rəsmisi Cəmil Həsənlinin namizədliyinə də öz münasibətini bildirib və heç də xoş və nikbin proqnozlar verməyib.
“Cəmil Həsənli ziyalı, alim kimi çox qiymətli bir adamdır. Ancaq Cəmil Həsənli ən uğursuz bir namizəddir. Cəmil Həsənli siyasi cəhətdən də təcrübəli deyil. Milli Şuraya daxil olan qüvvələrin böyük əksəriyyəti heç Cəmil Həsənlini qəbul etmir”.
ADP sədri bildirib ki, Müsavat Partiyası C. Həsənlini yalnız üzdə dəstəkləyir. Milli Şuranın indiki durumuna bir məsəllə qiymət verən partiya sədri təşkilat haqqında bədbin ehtimallar səsləndirib.
“Bataqlığa düşən bir insan, nə qədər çapalasa, o batacaq. Milli Şura da indi bir bataqlığa düşüb və çapalayır. Hazırda Rüstəm İbrahimbəyov artıq olmadığından bu o anlama gəlir ki, Rusiyanın da Milli Şuraya heç bir dəstəyi yoxdur. İndi Milli Şuranın namizədinin Həsənqulu, Hüseynqulu və ya başqasının olmasının nə mənası var”.
Aqşin KƏRİMOV
