Klassik Xalq Cəbhəsi Partiyasının (KXCP) sədri Mirmahmud Mirəlioğlunun prezidentliyə namizədliyi hələ də qüvvədədir. Bu barədə Modern.az saytına KXCP sədrinin müavini Xəzər Teyyub bildirib.
KXCP rəsmisinin sözlərinə görə, Milli Şurada təmsil olunmasına baxmayaraq, Mirmahmud Mirəlioğlunun namizədlikdən geri çəkilməsi üçün qərar verilməyib:
“Partiyanın Ali Məclisinin qərarı ilə Mirmahmud Mirəlioğlu prezidentliyə namizəd kimi irəli sürülüb. KXCP bildiyimiz kimi, bu gün Milli Şurada təmsil olunur. Bu baxımdan Mirmahmud bəyin namizədlik məsələsi bizdə açıq qalıb. Mirmahmud bəy hazırda Türkiyədədir. Ola bilsin ki, Mirmahmud bəy qayıdandan sonra partiyada yenidən bu məsələyə baxaq. Amma hazırda Ali Məclisin qərarı qüvvədədir”-deyə X.Teyyub bildirib.
Qeyd edək ki, Milli Şura yaranmazdan öncə KXCP sədri Mirmahmud Mirəlioğlu 2013-cü il prezident seçkilərinə qatılacağını bəyan etmişdi. Partiyanın qərarına əsasən, M.Mirəlioğlu hazırda KXCP-nin prezidentliyə namizədidir.
Anar RÜSTƏMOV
