Rüstəm İbrahimbəyovun prezidentliyə namizədliyinin qeydə alınmasına sədri olduğu Milli Şuradan reaksiya gecikmədi. Modern.az-a açıqlama verən Milli Şura üzvü Eldəniz Quliyev İbrahimbəyovun namizədliyinin qeydə alınmayacağını qabaqcadan bildiklərini deyib.
“Biz bu xəbərə təəccüblənmədik. Əvvəlcədən bilirdik ki, Rüstəm İbrahimbəyovun namizədliyi qeydə alınmayacaq. Buna baxmayaraq bizim mübarizəmiz davam edəcək. Biz bundan sonra Cəmil Həsənlinin namizədliyinin qeydə alınması uğrunda mübarizə aparacağıq. Rüstəm müəllim də bundan sonra Cəmil Həsənlinin qələbəsi naminə var gücü ilə çalışacaq”-deyə Milli Şura təmsilçisi bildirib.E.Quliyevin fikrincə, bu gündən etibarən Cəmil Həsənli artıq Milli Şuranın ehtiyat yox, prezidentliyə vahid namizədidir. Şura üzvü həmçinin İbrahimbəyovun bundan sonra Bakıya gəlib-gəlməyəcəyi haqda suala cavab verib. E.Quliyev artıq bu barədə heç nə deyə bilməyəcəyini vurğulayıb.
Anar RÜSTƏMOV
