“Bu, ermənilər növbəti təxribat cəhdidir”. Bunu Modern.az-a Naxçıvandan olan deputat, YAP Siyasi Şurasının üzvü Eldar İbrahimov bildirib. O, Moskvada ermənilərə məxsus Rusiya və “Yeni Naxçıvan” üzrə yeparxiyanın iqamətgahı olacaq kilsə kompleksinin açılış xəbərini şərh edərkən belə deyib: “Naxçıvana iddialar həmişə olub. Ermənistanda “Naxçıvan qardaşları” adlı cəmiyyət fəaliyyət göstərir. Bu dəfə də kilsəyə “Naxçıvan” adı qoymaqla yeni təxribat yaratmaq istəyirlər. Naxçıvanda həmişə ermənilər çox az sayda olublar. İndi sual olunur ki, ay erməni sən Naxçıvanda yaşamamısansa, necə olur ki, bura ərazi iddiaları edirsən?!”.
YAP-çı deputat vurğulayıb ki, “Naxçıvan problemi”ni qaldırmaqla ermənilər Dağlıq Qarabağ münaqişəsini kölgə altına almaq niyyətlərini güdürlər. “İstəyirlər ki, Dağlıq Qarabağ yaddan çıxsın”.
Qars müqaviləsini xatırladan deputat bildirib ki, ermənilər ümumiyyətlə tarixdən xəbərsizdirlər. “Kilsənin adında “Naxçıvan” sözünü çəkməklə heç nə dəyişməyəcək. Beynəlxalq aləm onsuz da kimin kim olduğunu yaxşı bilir”.
AMEA-nın vitse-prezidenti, millət vəkili İsa Həbibbəyli isə deyib ki, əvvəlki illərdə də Rusiyada, xüsusilə Moskvada erməni lobbisinin təzyiqi ilə kilsələrə “Naxçıvan” adının verilməsi hallarına rast gəlinib.
“Buna Azərbaycan, o cümlədən Naxçıvan Muxtar Respublikasının ictimaiyyəti öz kəskin münasibətini bildirib. Şübhəsiz ki, xristian abidəsinin “Yeni Naxçıvan” adı ilə təqdim olunması ermənilərin illərdən bəri iddiasında olduğu “Naxçıvan” mövzusunun tərkib hissəsidir. Bu elmi, siyasi, dini cəhətdən də yanlış bir mövqedir və təxribat xarakteri daşıyır. Çünki “Naxçıvan” adı həmişə türk-müsəlman dünyası ilə bağlı olub. Ona görə də xristian mülkiyyəti olan hər hansı bir tikiliyə “Naxçıvan” adının verilməsi dini nöqteyi-nəzərdən də təxribatdır. Bu təxribat ictimaiyyət tərəfindən qəbul olunan deyil. Dünya bilir ki, Naxçıvan Azərbaycanın ayrılmaz tərkib hissəsidir”, – deyə AMEA rəsmisi vurğulayıb.
Aqşin Kərimov
