Cəmil Həsənli Milli Şuranın yeni vahid namizədi seçiləndən sonra bu quruma qarşı münasibətlər bir qədər dəyişdi. Belə ki, Rüstəm İbrahimbəyovun namizədliyini qəbul etməyən bəzi müxalif qüvvələr professor Cəmil Həsənlinin namizədliyinə müsbət baxmağa başladılar. C.Həsənlinin seçkidə təkcə müxalif cəbhə tərəfindən deyil, eləcə də ölkənin düşünən beyni - elm xadimləri, ziyalı ümrə, yazıçılar və s. geniş kütlə tərəfindən dəstək alacağı gözlənilir.
Seçkidə iştirak etməkdən imtina edən Vətəndaş Həmrəyliyi Partiyasının (VHP) sədri, millət vəkili Sabir Rüstəmxalı mətbuatda Cəmil Həsənli haqda dərc olunan məqaləsi ilə diqqət çəkib. Onun da Cəmil Həsənlinin namizədliyini dəstəkləyəcəyi istisna edilmir.
Modern.az Sabir Rüstəmxanlından Cəmil Həsənlinin namizədliyi barədə münasibət öyrənməyə çalışıb.
Millət vəkili ziyalı kimi Cəmil Həsənliyə böyük hörmətinin olduğunu deyib. Onun namizədliyini dəstəkləyib-dəstəkləməyəcəyi barədə isə rəhbərlik etdiyi partiyanın qərarının olmadığını bildirib.
“Cəmil Həsənliyə bir ziyalı kimi böyük hörmətim var. Namizədlik məsələsi siyasi məsələdir. Bizim belə bir qərarımız yoxdur. Daha doğrusu, indi vaxtım olmadığından mən bu barədə daha sonra mövqeyimi bildirəcəm. Amma qeyd edim ki, dünən mətbuatda mənim Cəmil Həsənli haqda yazımı dərc edərək bildirirlər ki, guya mən bu yazını Cəmil bəy namizəd olandan sonra yazmışam. Bu belə deyil. Mən Cəmil bəyə həsr etdiyim yazını çoxdan yazmışam”-deyə S.Rüstəmxanlı qeyd edib.
Anar RÜSTƏMOV
