Sabah İctimai Televiziya və Radio Yayımları Şirkətinin yaranmasının 8 ili tamam olur. Televiziyanın 8 illik fəaliyyəti ilə bağlı Modern.az İTV-dən verilən məlumatı təqdim edir. Avqustun 29-da İctimai Televiziya və Radionun yaradılmasının 8 ili tamam olur. 8 il əvvəl müstəqil Azərbaycanda İctimai Televiziyanın yaradılması zamanı dünyada mövcüd ictimai yayımçılığın ən yaxşı nümunələrinin təcrübəsi əsas götürülüb. Bütün ictimai teleradio kanalları xüsusi qanunvericilik əsasında formalaşır. Azərbaycan bu qanunu 2004-cü ilin sentyabrında qəbul edib. Xatırladaq ki, istənilən ictimai yayıma cəmiyyət müvafiq kollegial orqanlar vastəsilə nəzarət edir. Azərbaycan cəmiyyətinin İctimai Televiziyaya belə nəzarət mexanizmi "İctimai Televiziya və Radio Yayımları haqqında" Azərbaycan Respublikasının qanununda öz əksini tapıb.
Bəli, İctimai Televiziya 8 ildir ki, Azərbaycan qanunlarını və klassik ictimai yayımçılığın başlıca prinsiplərini rəhbər tutaraq fəaliyyət göstərir. Ötən 8 ilin başlıca yekunu İctimai teleradio yayımları şəbəkəsinin tam formalaşması, cəmiyyət qarşısında hesabatlı olması, peşəkarlığın daim artması ilə xarakterizə olunur. Son üç ayda İTV-də tərəfsiz və qərəzsiz informasiya yaymaq, obyektiv təhlillər aparmaq, cəmiyyətin siyasi, etnik, dini rəngarəngliyini əks etdirmək, ümummilli dəyərlərə üstün yer ayırmaq, maarifçilik istiqamətli proqramlar hazırlamaq əsas prioritetlərdəndən olmuşdur.
Tanınmış kinorejissor Əməkdar İncəsənət Xadimi Cəmil Quliyevin şirkətə rəhbərlik etdiyi son aylar ərzində bu qurumda yeni yaradıcılıq mühiti nəzərə çarpır. İTV-nin yeni, bacarıqlı kadrlarla komplektləşdirilməsi özünü televiziya və radio proqramlarında əyani göstərir. Ölkədaxili informasiyalarda dövlət orqanlarının fəaliyyətini əks etdirən xəbərlərlə yanaşı, siyasi sistemin müxtəlif yönlərindən, vətəndaş cəmiyəti qurumlarından, ayrı-ayrı bölgələrdən, ictimai maraq doğuran hər kəsdən gələn yeniliklər fərq qoyulmadan şərh verilmədən yayımlanır. "Carçı" informasiya proqramında, "Yeni Gün", informasiya proqramında, "Din və cəmiyyət", "Ortaq məxrəc", "Azərbaycan təbiəti", "Salam əsgər", "Xəmsə", "Ailəm-aləm", "Ozan", "Sovqat", "Bakı vaxtı", "Qərib axşamlar " və digər proqramlarda rəngarənglik, aktuallıq tamaşaçıları razı salır.
"İctimai Televiziya və Radio yayımı haqqında" Azərbaycan Respublikasının qanununda efirə və ekrana çıxan proqramlarda milli -mənəvi dəyərləri, adət-ənənələri, mədəniyyət və incəsənətin bütün rəngarəngliyini əks etdirmək tövsiyyə edilir. Bu məsələyə İctimai televiziyanın xüsusi diqqət ayırması ictimai yayımçı kimi vəzifə borcunu layiqincə yerinə yetirməsi ilə müşaiyyət olunur. Azərbaycanda İctimai Televiziyanın fəliyyətə başlaması ölkə mədəniyyətinin və incəsənətinin dünya miqyasında tanınması və təbliği istiqamətində daha bir yeniliyin əsasını qoyub. Söhbət Azərbaycanın dünyanın ən böyük musiqi yarışması sayılan "Evrovision" mahnı müsabiqəsində iştirak hüququ qazanmasından gedir.
Bakı müsabiqəsi indiyədək keçirilən bütün yarışmalardan bir sıra məqamları ilə fərqləndi. Geniş auditoriyası olan bu musiqi şousunun Bakıda təşkili milonlarla insana Azərbaycan dövlətinin apardığı uğurlu sosial- iqtisadi siyasətin nəticələrini görmək, hiss etmək xalqın yaşam tərzinin yüksəldiyinin şahidi olmaq imkanını qazandırdı. Bu şansı isə ölkədə İctimai Televiziyanın fəaliyyətə başlaması, özünü sübut etməsi faktı yaratmışdır. Dünya ictimai yayım konsepsiyasının əsas tələblərindən biri də milli, dini azlıqların hüquq və azadlıqlarına diqqət yetirməkdir. İctimai Televiziya fəaliyyətə başladığı ilk günlərdən bu konsepsiyanı fəaliyyətinin mühüm tərkib hissəsi hesab edib. Bu kanalın qapıları siyasi baxışlarından, dini görüşlərindən, milli mənsubiyyətindən asılı olmayaraq hamının üzünə açıqdır.
Ötən 8 ildə "Carçıfilm" yaradıcılıq birliyi çoxsaylı televiziya filmləri hazırlamış, bu filmlərdə əsas diqqət milli-mənəvi dəyərlərimizin qorunmasına, tariximizin öyrənilməsinə yönəldilmişdir. Azərbaycan Respublikası Prezidentinin milli teleserialların çəkilişlərinə xüsusi fikir verməsi və bununla bağlı müəyyən vəsait ayırması İctimai Televiziyada kino sahəsində başlanan işin keyfiyətini bir az da artırıb. Bu məqsədlə teleşirkət yeni müasir kino çəkilişi avadanlıqları alıb, yeni teleserialların çəkilişlərinə hazırlıq görülür.
İTV-də fəaliyyət göstərən dublyaj departamenti Azərbaycan tamaşaçısının zövqünə uyğun yeni filmlərin tərcüməsi və dublyajı üzərində gərgin iş aparır. İctimai Televiziya və Radio 24 saat ərzində Azərspace və Hotbird peykləri vastəsilə dünyanın əksər ölkələrinə, www.itv.az ünvanlı internet saytı ilə bütün dünyaya yayımlanır. Avqustun 29-da Azərbaycan vətəndaşları eləcə də dünyanın bir sıra ölkələrində məskunlaşmış soydaşlarımız "Yeni gün"ün saat 9:00-dan 14:00-dək yayımlanan xüsusi proqramında, habelə "Carçı" xəbərlər proqramının bütün buraxılışlarında, "İTV 8 il .Ekran-efir yollarında" (21:00 - 22:00), saat 22:00-dan 00:00-dək göstəriləcək musiqi proqramında, "Ortaq məxrəc"in xüsusi buraxılışında İctimai Teleradionun keçdiyi şərəfli yola əyani nəzər sala biləcəklər. Həmin gün ölkənin bir sıra tanınmış ictimai-siyasi xadimləri, söz-sənət adamları, qonşu ölkələrin teleradio şirkətlərinin rəhbərləri, nüfuzlu jurnalistləri İctimai Teleradio şirkətinə ünvanladıqları təbrikləri də səslənəcək. İctimai Teleradio şirkətinin əməkdaşları bu qurumunun 8 yaşını yüksək yaradıcılıq və texniki nailiyyətlərlə qeyd edirlər.
Aytən ƏLİYEVA
