Səmərqənd şəhərində keçirilən 9-cu Beynəlxalq “Şərq təranələri” festivalı davam edir.
Festivalı işıqlandırmaq üçün Özbəkistana dünyanın 30 ölkəsindən Rusiya, Almaniya, Çin, Malaziya, İndoneziya, Əfqanıstan, Türkiyə, Azərbaycan və digər ölkələrdən KİV nümayəndələri gəlib. Ümumilikdə isə xarici və yerli jurnalistlərlə birlikdə tədbiri işıqlandırmaq üçün 200 jurnalist qeydiyyatdan keçib.
Dünən Səmərqənd şəhərinin hakimi Əkbər Şükürovun adından jurnalistlər üçün ziyafət təşkil edilib. Ziyafətdə informasiya ötürücülük qabiliyyəti və operativliyi ilə seçilən jurnalistlər şəhər hakimi adından şəhər hakiminin müavini Baxıt Rəhimov xatirə hədiyyələri ilə mükafatlandırıb.
Mükafat alan jurnalistlər içərisində Azərbaycan Televiziya və Radio Verilişləri QSC-nin Özbəkistan və Mərkəzi Asiya Respublikaları üzrə xüsusi müxbir postunun rəhbəri Aida Eyvazova, həmçinin Türkiyənin TRT kanalının Özbəkistan təmsilçisi Mehmet Kişlar da var. Jurnalist həmkarımız jurnalistlərə göstərilən qayğı və diqqətə görə ölkə rəhbəri İslam Kərimova və şəhər hakimi və “Şərq təranələri “ mətbuat mərkəzinin rəhbəri Səfər Ostanova minnətdarlığını bildirərək qeyd edib ki, İslam Kərimov 2500 yaşlı Səmərqənd şəhərini , yenidən Əmir Teymurun abad etdiyi qədim Səmərqəndə bənzədə bilib.
Modern.az
