“Hazırda bütün dünya Azərbaycan iqtidarının qazandığı uğurlardan və müxalifətin isə uğursuzluğundan danışır. Onların yerinə biz utanırıq”. Modern.az-ın məlumatına görə, bu sözləri Baş nazirin müavini, “Dövlətqaçqınkom”un sədri, YAP sədrinin müavini Əli Həsənov Qubadlının işğalının 20-ci ildönümü ilə bağlı “Şəhriyar” Mədəniyyət Sarayında keçirilən anım tədbirində söyləyib.
Əli Həsənov müxalif qüvvələrin birləşdiyi Milli Şuranın prezidentliyə yeni vahid namizədi Cəmil Həsənli barədə də danışıb. O, Cəmil Həsənlini müsbət imici olan tanınmış elm adamı kimi xarakterizə etməklə yanaşı, onun müxalifətin oyununa salındığını vurğulayıb.
Ə.Həsənovun sözlərinə görə, Milli Şura namizədliyini verməklə Cəmil Həsənli kimi abırlı-həyalı elm adamını pis vəziyyətə salacaq.
Jurnalistlərə açıqlamasında Əli Həsənov Dağlıq Qarabağ probleminin həlli sonuna yaxınlaşmaq üzrə olduğunu deyib.
“Biz tam əminik ki, ölkə prezidenti cənab İlham Əliyevin rəhbərliyi altında yaxın gələcəkdə mütləq qalibiyyət gününə yığışacağıq. Gün gələcək, bu torpaqlar azad olunacaq. Ölkə prezidenti necə ki, Azərbaycan dövlətini, xalqını bütün dünyaya qısa müddətdə tanıdıb, bütün dünyanın maraq mərkəzinə çevirib, bu problemin də həllinə nail olacaq. Hesab edirik ki, ölkədə bu problemdən başqa ciddi problem qalmayıb. Yeganə problemimiz Ermənistan-Azərbaycan, Dağlıq Qarabağ münaqişəsidir, o da həllini tapacaq”.
Modern.az
