“Nə zaman “Qızıl teşt” pyesinin teatr üçün mühüm olacağını hesab edəcəyiksə, o zaman tamaşaya qoyacağıq”. Bu sözləri Modern.az-a açıqlamasında Azərbaycan Milli Dram Teatrının direktoru İsrafil İsrafilov deyib.
Direktoru bildirib ki, hər bir teatrın özünün təbiəti, seçimi və estetik hədəfləri var. “Teatra diktə etmək olmaz ki, bunu qoy və ya başqasını. Bir “Qızıl teşt”lə Seyran Səxavət dramaturq olub? Başqa nə pyes yazıb ki? Hər bir teatrın özünün strategiyası var. Bu gün ola bilər ki, Şekspirin “12-ci gecə”, “Hamlet” əsəri teatr tamaşaya qoymağa vacib saymır.
Seyran Səxavətin cəmi bir pyesi var, o da vaxtilə tamaşaya qoyulub və bitib. Heç söhbəti getmir ki, Cəfər Cabbarlının bu qədər pyesi niyə tamaşaya qoyulmur? Seyran Səxavət Cəfər Cabbarlıdan böyük yazıçıdır ki? Çünki hər bir şeyin zamanı, vaxtı var. Teatr cəmi 6-7 tamaşa qoyacaq. Əbdürrəhman bəy Haqverdiyevin, Cəfər Cabbarlının, Hüseyn Cavidin əsərlərini tamaşaya qoymaq lazımdır. Zaman gələcək digər dramaturqlara da müraciət edəcəyik”.
Aytən ƏLİYEVA
