Ötən gün Modern.az saytı Gürcüstanda yaşayan azərbaycanlıların dini təzyiqlərə məruz qalması haqda məlumat yaymışdı. Həmyerlilərimizin üzləşdikləri problemlərə Qafqaz Müsəlmanları İdarəsindən reaksiya gəlib.
QMİ-nin sədr müavini hacı Fuad Nurullayev Modern.az saytına açıqlamasında bildirib ki, şeyxülislam Allahşükür Paşazadə Gürcüstan azərbaycanlılarının problemlərinin tezliklə həll edilməsi üçün öz tapşırıqlarını verib.
F.Nurullayevin sözlərinə görə, Allahşükür Paşazadə bu məsələdə öz nüfuzundan istifadə edəcək:
“Şeyx həzrətləri bu məsələ ilə bağlı məlumatlıdır. Soydaşlarımızı problemlərinin həll edilməsi üçün şeyx tərəfindən lazımı addımlar atılacaq. O, bu işin həll edilməsi üçün əlindən gələni edəcək. Qarşılıqlı anlaşma ilə şeyx özünün nüfuzundan istifadə edərək çalışacaq ki, müsəlmanların bu problemləri aradan qaldırılsın. Biz bu məsələyə münasibət bildirəcəyik.
Biz Qafqaz Müsəlmanları olaraq heç bir məscidə, sinaqoqa, kilsəyə qarşı atılan addımı dəstəkləmirik, pisləyirik. İslamda, Quranda bütün ibadətlər Allaha məxsusdur. Biz xalqlar arasında sülhü, mehribançılığı dəstəkləyirik.
Şeyxin qərarı budur ki, xalqlar arasında dostluğun, tolerantlığın qorunması üçün bütün addımlar atılsın”-deyə QMİ rəsmisi açıqlamasında bildirib.
Qeyd edək ki, Gürcüstan parlamentinin üzvü deputat Azər Süleymanov və “Borçalı” İctimai Cəmiyyətinin sədri Zəlimxan Məmmədli Modern.az-a açıqlamalarında soydaşlarımıza qarşı rəsmi Tiflis tərəfindən dini haqsızlığın edildiyini, insanların ibadət imkanlarının məhdudlaşdırıldığını bildiriblər. Müsahiblərimiz müsəlmanlara qarşı ədalətsizliyin aradan qaldırılması üçün Qafqaz Müsəlmanları İdarəsinə müraciət edərək kömək istəyiblər.
Anar RÜSTƏMOV
