Xəbər verdiyimiz kimi, eks-spiker Rəsul Quliyevin lideri olduğu Açıq Cəmiyyət Partiyası bir neçə gün əvvəl (ACP) Nərimanov rayonunda yerləşdiyi qərargahından çıxarılıb. Ofisin sahibi iş adamı Azər Əsgərov onu ACP-dən geri alsa da, qərargahın başqa bir müxalifət partiyasına veriləcəyi bildirilir.
Modern.az-a daxil olan məlumata görə, hazırda boş qalan ofis uzun müddətdir qərargahsız fəaliyyət göstərən AXCP-ə veriləcək.
Mənbə bildirir ki, hazırda bununla bağlı danışıqlar aparılır.
Əməkdaşımız məlumatı dəqiqləşdirmək üçün AXCP-nin sədr müavini Fuad Qəhrəmanlı ilə əlaqə saxlayıb. Partiya rəsmisi Modern.az-a açıqlamasında bildirib ki, qiymətdə razılığa gəlinərsə, AXCP qərargahı icarəyə götürə bilər:
F.Qəhrəmanlı ofisin hazırki icarə haqqının həddindən artıq baha olduğunu deyib:
“Biz uzun müddətdir qərargahsız fəaliyyət göstəririk. Partiyanın qərargaha ehtiyacı var. Amma həmin obyektin icarə haqqı çox baha olduğundan bizim buna imkanımız çatmır. Qiymət bizim üçün münasib olarsa, təbii ki, icarəyə götürə bilərik”.
Qeyd edək ki, ACP iki ilə yaxın idi iş adamı Azər Əsgərova məxsus ofisdə icarə əsasında fəaliyyət göstərirdi. Yayılan məlumatlara görə, ACP obyekt üçün aylıq 7 min dollar icarə haqqı ödəyirmiş.
Anar RÜSTƏMOV
