Bu gün Qubadlı rayonunun işğalından 20 il ötür. Modern.az saytı Qubadlıdan olan bir qrup sənət adamının rayon haqqında xatirələrini öyrənib.
Tanınmış skripka ifaçısı Ceyhun İsmayılov (Maestro Ceyhun):
”Qubadlı rayonu 1993-cü ilin avqust ayının 31-də işğal olunub. Axırıncı dəfə 1992-ci ildə getmişdik. Sumayıtda dünyaya gəlsəm də, əslim Qubadlının Əyin kəndindəndir. Hər ilin bir ayını rayonda olurduq. Hökümətin bir aylıq məzuniyyətini Qubadlıda keçirirdik. Mənimçün həm Sumqayıtın, həm də Qubadlının öz özəlliyi var. Buranın da böyük əksəriyyətini Qubadlı camaatı təşkil edir. Xeyir-şərimiz bir yerdədir”.
Tanınmmış ifaçı Qubadlı haqda bildiklərindən də danışıb:
“Qubadlıdan bizim Qaçaq Nəbimiz, Həcərimiz var. Bəzi tarixi mənbələrə görə, hətta Koroğlunun da orda bir istehkamı olub. Şair Ramiz Rövşən, Simfonik orkestrin dirijoru, maestro Rauf Abdullayev, yazıçılar Əli Vəliyev, Süleyman Rəhimov kimi tanınmış şəxsiyyətlərmiz var.
O vaxt mən uşaq idim. 70-ci illərdə ulu öndər Heydər Əliyev Moskvada işləyəndə Azərbaycana Kamran Bağırov rəhbərlik edirdi. Kamran Bağırov demişdi ki, hər bir rayon ölkəyə öz töhfəsini verir. Məsələn, Lənkəran çayını, Göyçay narını, Abşeron neftini, Quba almasını, Mingəçevir elektrik verir. Qubadlıya gələndə demişdi ki, “Qubadlı bizə kadrlar verir”.
İnstrumentalçı Qubadlıya aid rəqs yazdığını bildirib:
“Ötən il rayonumuza aid bir rəqs yazmışam. Bizim bu gün də Elton Hüseynəliyev, Namiq Məna, Zahid Qubadlı kimi tanınan və sevilən sənət adamlarımız var. Qubadlı rayon İcra Hakimiyyətinin başçısı Malik müəllimə də öz təşəkkürümü bildirirəm. Ona görə ki camaatımızın xeyirində də, şərində də özü şəxsən iştirak edir. Sumqayıtda Qubadlının mədəniyyət mərkəzi, məktəbləri var. Cənab prezidentin qayğısının davamı olaraq bu işlər görülür. Güman edirik ki, inşallah yaxın vaxtlarda yenidən öz torpaqlarımıza qayıdacağıq. Qubadlı Qafqaz və Yaxın Şərqdə yeganə rayondur ki, ərazisindən iki çay- Bərgüşad və Həkəri axır. Bu çayların hər ikisinin mənbəyi Türkiyədən götürülür və Ermənistandan keçir, Araza tökülür. Hər iki çayın da balıqları çox fərqlidir - göy balığı, fareli, qızıl balığı var. Bunlarda heç Xəzər dənizində də yoxdur”.
Tanınmış klarnet ifaçısı Zahid Qubadlı isə sonuncu dəfə doğma yurdunu 1992-ci ildə görüb: ”Qubadlıdan 1992-ci ildən çıxmışam. Uşaqlığımız oralarda keçib. Qubadlıdan çıxanda 16 yaşım var idi. Elə bilirəm ki 16 yaşımda da donub qalmışam. Son vaxtlar Qubadlıda çox güclü inkişaf gedirdi. Hər kəs öz işi ilə məşğul idi.
Mənim atam Qubadlının ən məhur klarnet ifaçısı olub-Qaroğlan. Qubadlı işğal olunandan sonra bir daha klarneti əlinə götürmədi. Deyirdi ki, ancaq doğulduğum rayona qayıdandan sonra ifa edə bilər. Adam bu barədə dərindən düşünəndə az qalır ki, havalansın. İndi biz də istəyirik ki, münaqişə sülh yolu ilə həll olunsun. Mənim dayım oğlu, bibim şəhid olub, 3 qardaşım müharibə veteranıdır. Yəni döyüşə hər zaman hazırıq. Ali baş komandanın əmrinə tabeyik və bu əmri gözləyirik. Bilirsiniz ki, bu təkcə Ermənistanla Azərbaycanın işi deyil. Ermənistanı dəstəkləyən böyük dövlətlər var. Əgər ermənilərə qalsa, Qarabağı bir aya alarıq. Mənim özüm bu dəqiqə ürəklə döyüşərəm. Təki bilək ki, torpaqlarımız alınacaq”.
Sənətçi bildirib ki, Qubadlı Azərbaycana böyük ziyalılar, generallar verib:
“Yazıçılarımız, şairlərimiz, mədəniyyət xadimlərimiz, idmançılarımız var. Son zamanlar Maestro Ceyhun, Namiq Məna, rəhmətlik Fəxrəddin kimi sənət adamları verib. Qubadlıdan Qaçaq Nəbi kimi oğul çıxıb. Qubadlıya aid klip çəkdirmişəm. Qismət olsa, efirə verəcəyəm. O klipdə Milli Qəhrəmanımız Əliyar Əliyev, Həsən Qorxmazla bağlı görüntülər var.
Mənim özümün “Qubadlı” adlı mahnım var. Bundan əlavə də “Qaçaq Nəbi” mahnısına klip çəkdirmişəm”.
Qubadlıdan olan digər sənətçi, müğənni Akif Rəhimzadə isə Qarabağ döyüşlərinin iştirakçısı olub:
“Mən Ağdamda, Goranboyda döyüşlərdə iştirak etmişəm. Qarabağı qarış-qarış gəzmişəm. Qubadlıdan Süleyman Rəhimov kimi ziyalı, Qaçaq Nəbi, Əlyar Əliyev, Kərəm Mirzəyev kimi əfsanəvi qəhrəmanlarımız çıxıb. Qubadlıda çox böyük sərvətlərimiz qalıb”.
İntiqam Valehoğlu
