“Zahid Oruc elə bir insandır ki, onun istər parlament seçkilərində, istərsə prezident seçkilərində namizəd kimi iştirak etməyə, özünü sınamağa tam haqqı var. Çünki bu haqqı o, özü qazanıb, öz siyasi, deputatlıq fəaliyyəti ilə bunu haqq edib”. Bunu mətbuata açıqlamasında Bərdə rayon sakini, Bərdənin, ümumən Qarabağın tanınmış, nüfuzlu ziyalılarından biri, yüzlərlə şagirdi, yetişdirməsi olan tarixi müəllimi Minayə Nəbaqi dilə gətirib.
Onun dediyinə görə, 13 illik deputatlıq fəaliyyəti dövründə Z.Orucun Bərdənin inkişafında, quruculuğunda, abadlaşdırılmasına, rayonun qazlaşdırılmasında, fasiləsiz elektrik enerjisi ilə təmin olunmasında, kənd yollarının müasir vəziyyətə gətirilməsində və sair, xidmətləri saysız-hesabsız, əvəzsiz və ölçüyəgəlməzdir. M.Nəbaqi qeyd edib ki,Z.Oruc bu illər ərzində bərdəlilərin çox yaxından tanıdığı və onları tanıyan bir insandır: “O, öz fəaliyyəti, səmimiliyi, mehribanlığı, insanlara qarşı son dərəcə mədəni, mülayim rəftarı ilə hər birimizin-hər bir bərdəli ailəsinin bir üzvünə çevrilib. O, bizlərdən biridir, bizim birimizdir. Bərdədə böyükdən-kiçiyə kimi hamı onu sevir, hörmət edir. Zahid müəllim eyni zamanda, çox canıyanan adamdır. Hər zaman insanların sevincini də, kədərini də bölüşməyə çalışır. Məsəl var ki, dərd paylaşdıqca azalar, sevinc paylaşdıqca çoxalar. Zahid müəllim də öz canıyananlığı ilə insanların dərdini paylaşıb onu azaldan, sevincini paylaşıb onu artıran insandır. O, əsl xeyir-şər adamıdır. Hamının problemini həll etməyə çalışan və çox zaman da bu nail olan bir insan, millətinin vəkilidir. Biz bərdəlilər bir həftə onu görməyəndə çox darıxır və narahat oluruq.Vallah, onun haqda danışmaqla qurtarası deyil. O, bizim hər birimizin doğmamız, əzizimiz və sevimlimizdir”. M.Nəbaqinin bildirdiyinə görə, Z.Orucun fəaliyyətində ən çox diqqət çəkən məqamlardan biri də onun Bərdədə Qarabağ Universitetinin açılması ilə bağlı parlament kürsüsündən təklif səsləndirməsidir: “Bu, bizi hər birimizin ürəyindən xəbər verən məsələdir. Əminik ki,o,bunu edəcək və Qarabağımızda müasir ali təhsil ocağının yaranması düşmənlə ideolojı savaşımıza əlavə bir töhfə olacaq. Bunun bizim üçün sözlə belə ifadə edilməyəcək dərəcədə böyük mənası var” . Bərdə sakini eyni zamanda deyib ki, Azərbaycan demokratik, hüquqi dövlətdir və hər kəsin, seçib-seçilmək hüququ olan hər bir Azərbaycan vətəndaşının da hüququ var ki, seçkilərdə iştirak etsin: “Odur ki, Zahid müəllimin də tam mənəvi-siyasi haqqı çatır ki, seçkilərdə millətimizin səsini uca kürsülərdən ifadə etsin. Biz ona inanırıq və bu seçkilərdə Zahid Oruca xalqımızla birgə uğurlar diləyirik".
Modern.az
