Abşeron yarımadasında, ilyarımdan bir qədər çox müddət ərzində Qaradağ Günəş Elektrik Stansiyasının fəaliyyətə başlaması, Azərbaycanın bərpaolunan enerji sektorunda həyata keçirdiyi, strateji hədəfləri olan siyasətin, hələlik lokal müstəvidə özünü büruzə verən uğuru kimi də qiymətləndirilə bilər.
Bu sözləri Modern.az saytına açıqlamasında Prezident İlham Əliyevin Qaradağ Günəş Elektrik Stansiyasının rəsmi açılış mərasimindəki çıxışını şərh edən millət vəkili Azər Kərimli deyib.
Millət vəkili qeyd edib ki, regionun ən böyük Günəş Elektrik Stansiyasının ölkəmizdə insaşı, Azərbaycanın digər istiqamətlərdə olduğu kimi, bərpa olunan enerji sahəsində də lider olduğunun sübutudur: “Bu layihənin icrası, həm də Azərbaycanla Birləşmiş Ərəb Əmirlikləri arasındakı dostluq, qardaşlıq münasibətlərinin, həmçinin ölkəmizdəki əlverişli investisiya imkanlarının göstəricisidir. Azərbaycanla BƏƏ arasında bərpa olunan enerji istehsalının yüsəldilməsinə xidmət edəcək daha 3 investisiya sazişinin imzalanması, iki ölkə arasındakı qarşılıqlı etimadlı münasibətlərin yüksək səviyyəsindən xəbər verir. Birgə əməkdaşlığın mərhələlərlə 10 qiqavata qədər bərpaolunan enerji istehsal etmək potensialına kimi inkişaf etdirilməsi hədəfi isə, cənab Prezidentin qeyd etdiyi kimi, regionun enerji inkişafında inqilabi sıçrayış olacaq”.
Azər Kərimlinin sözlərinə görə, dünyada baş verən geosiyasi dəyişiklər Avropada Azərbaycan qazına olan tələbatı ən yüksək səviyyəyə çatdırıb: “Azərbaycanın təşəbbüsçüsü, iştirakçısı və əsas təminatçısı olduğu Cənub Qaz Dəhlizinin vaxtında istismara verilməsinin əhəmiyyəti, hazırda dünyada baş verən qarşıdurmalar fonunda daha aydın şəkildə görünür. Amma Azərbaycanın hədəfləri bununla kifayətlənmir və ölkəmizin bərpaolunan enerji sahəsində həyata keçirdiyi layihələr, həm də Xəzər-Avropa İttifaqı enerji dəhlizinin önəmli bir seqmentini təşkil edir”.
Millət vəkili bildirib ki, hazırda Azərbaycanın qarşısında dayanan olduqca vacib məsələlərlə- Qarabağ və Şərqi Zəngəzur rayonlarının yenidən qurulması, Böyük Qayıdışın həyata keçirilməsi ilə yanaşı, bərpaolunan enerji sahəsində nəhəng layihələrin həyata keçirilməsi, prosesin işğaldan azad edilən, terrorçulardan, qanunsuz hərbi birləşmələrdən təmizlənən ərazilərimizi də əhatə etməsi ölkəmizin gücünün göstəricisi və bu gücü formalaşdıran strateji zəkanın uğurudur.
Azər Kərimli qeyd edib ki, siyasi iradə, uzaqgörənlik, strateji planlama məharəti və onun zərgər dəqiqliyi ilə həyata keçirilməsi, eləcə də cəmiyyətdəki birlik bütün hədəflərə nail olmaq üçün zəmin yaradır.
