Kanadanın əhalisinin 95%-i fransızdilli olan və Kanadada erməni millətçi təşkilatlarının mərkəzi sayılan Kvebek bölgəsində doğulan və uzun müddət bu bögənin siyasi həyatında iştirak edən Melani Colinin Azərbaycanın ünvanına əsassız ittihamlar səsləndirməsi həm onun şəxsi ermənipərəst mövqeyindən, həm də təmsil etdiyi ölkəyə tapşırılan missiyadan irəli gəlir.
Bu sözləri Modern.az-a açıqlamasında millət vəkili Azər Kərimli deyib.
Millət vəkili qeyd edib ki, milyondan çox azərbaycanlını öz evindən 30 ildən artıq bir zaman kəsiyində didərgin salan, Azərbaycanın yaşayış məntəqələrini viran qoyan Ermənistana qarşı, hətta bu ölkə BMT Təhlükəsizlik Şurasının qətnamələrində işğalçı kimi tanındığına baxmayaraq, ən azı humanizm nöqteyi-nəzərindən heç bir çağırış etməyən Kanadanın xarici işlər nazirinin “deportasiya”dan söz açması siyasi simasızlığın, qərəz və səlibçi təfəkkürün bariz nümunəsidir: “İşğala son qoyulsa da Ermənistanın Azərbaycan torpaqlarında həyata keçirdiyi misli görünməmiş vandalizm, hələ də öz evlərindən etnik təmizlənməyə, soyqırıma məruz qalmaqla qovulmuş azərbaycanlıların əhəmiyyətli hissəsinin doğma yurd yerlərinə geri dönməsinə imkan vermir. Ermənistandan zorla,xüsusi amansızlıqla deportasiya edilmiş 300 min azərbaycanlının hüquqları bu günə qədər bərpa edilməyib və Kanada da daxil olmaqla, bu proksi ölkəni yönəldənlər də bu barədə susurlar”.
Millət vəkili qeyd edib ki, bir ölkənin xarici işlər nazirinin başqa bir ölkənin ərazisindən üçüncü dövlətin sərhədlərini binoklla müşahidə etməsi diplomatik səriştəsizliklə yanaşı, həm də protokol qaydalarının, etik normaların kobud şəkildə pozulmasıdır: “Görünür Melani Coli uzun müddət turizm, əsas dillər və Frankofoniya naziri olduğu üçün özünü hələ də turist kimi hiss edir”.
Azər Kərimli Kanadanın yarandığı gündən forpost missiyasını icra etdiyini, siyasi proseslərdə Birləşmiş Ştatların vassallığından kənara çıxa bilmədiyini bildirib: “Vaşinqtonun marionet ölkələrindən biri kimi Kanada hökumətinin səlahiyyətləri, hətta ABŞ ştatlarının qubernatorlarından da aşağıdır. Bir zamanlar Kvebek meri seçkilərində məğlub olan Meloni Coli, görünür ABŞ “quberniyası”nın xarici siyasət idarəsinin rəhbəri statusunda da özünü məğlub komandanın təmsilçisi kimi hiss edir. Meloni Colinin açıqlamalarında faktların təhrif olunması, yalan və böhtan üzərində qurulan ritorika da bizlərə yaxşı tanışdır və ABŞ-ın Milli Demokratiya İnstitutunun layihə rəhbərlərinin həyasızcasına yalan uydurmaq “məharətindən” fərqlənmir”.
Millət vəkili qeyd edib ki, Meloni Colinin adi coğrafi bilgilərinin olmadığını, nəqliyyat dəhlziləri və yük daşınmaları ilə bağlı savadsız şəkildə mülahizə yürütdüyünü vurğulayıb: “Kanadanın elektrik enerjisinə olan ehtiyacının 15%-ni bu ölkədəki Atom Elektrik Stansiyaları ödəyir. Kanadanın öz uran ehtiyatları olmadığı üçün isə, uranı əsasən Orta Asiya ölkələrindən alır. Uranın hava nəqliyyatı vasitəsilə daşınması mümkün deyil. Bu halda Kanadanın iki yolu qalır, uranın Çin və Azərbaycan üzərindən daşınması. Çinin buna razılıq verəcəyi mümkün deyil. Azərbaycan isə istənilən vaxt ixracın qarşısını almaq imkanına malikdir. Kanadanın beynəlxalq hüquqa zidd, aqressiv və qərəzli davranışları isə belə bir addımın atılmasını zəruri edir”.
