Millət vəkili Qənirə Paşayeva ağır xəstəliyə tutulan 14 yaşı Akif Məmmədovla bağlı səhiyyə naziri Oqtay Şirəliyevə müraciət etməyə hazırlaşır. Modern.az-ın məlumatına görə, bu barədə deputat Facebook səhifəsində bildirib:
”14 yaşlı Akiflə bağlı yazını dünən axşam oxudum və bütün gecə demək olar ki, yata bilməmişəm. Gözümün qarşısından getmirdi onun “yardım edin” deyən gözləri. Ağdamda ön cəbhə bölgəsində yaşayan Akifin dərdinin əlacı olsa və ölkımizdə kömək etmək imkanı olsaydı dostlara da müraciət edib birlikdə ona kömək etməyə çalışardıq. Amma onun xəstəliyi yazılana görə nadir xəstəlikdir və müalicəsinin harada olub-olmadığı da ciddi araşdırılmalıdır. Bir az əvvəl bir millət vəkili kimi səhiyyə naziri Oqtay Şirəliyevə rəsmi məktub yazdım və sabah mürciətlə bərabər cənab nazirlə danışaraq Akifə necə kömək etmək olar istiqamətində xahiş edəcəm. Ailəsinin telefonunu axtarırlar uşaqlar. Anası ilə danışmaq istəyirəm. Kimdəsə varsa, mütləq bizə yazın.Allah özü ona kömək olsun. İnanıram ki, mütəxəssislər Akifin müalicəsi və sagalması imkanları ilə bağlı araşdırma aparacaqlar və belə bir ehtimal varsa, ona dövlət tərəfindən mütləq kömək olacaq. Allah heç bir uşağı belə bir vəziyyətə düşürməsin! Allah heç bir valideynə belə ağrı yaşatmasın! Allah Akifə kömək olsun! Bütün dualarımız onunladır”.
14 yaşlı Akif Məmmədova Ağdam rayonunun Çıraqlı kəndindəndir. Bir neçə gün öncə atasını itirən Akifin 4 yaşlı bacısı Dilarə Məmmədova da blyoz epidermoliz xəstəliyindən əziyyət çəkir.
A.Qorxmaz
