Bir müddət öncə Milli Məclisin Elm və təhsil komitəsinin sədri Şəmsəddin Hacıyev Azərbaycanın ali təhsil müəssisələrində qiyabi təhsil üzrə qəbulun 2015-ci ildən dayandırılacağını söyləmişdi. Deputat bildirmişdi ki, bununla bağlı qanunvericiliyə dəyişiklik ediləcək və o vaxta kimi qiyabi təhsil tədricən distant (məsafədən təhsil) təhsillə əvəz olunacaq
Deputatın açıqlaması ölkədə birmənalı qarşılanmayıb. Hətta narahatlığa səbəb olub.
Məsələyə Təhsil Nazirliyi də münasibət bildirib. Modern.az xəbər verir ki, nazirliyin bununla bağlı məlumatında qiyabi təhsilin ləğv edilməsinin müzakirəyə çıxarılmadığı bildirilib.
““Təhsil haqqında” Azərbaycan Respublikasının Qanuna əsasən, təhsilalma formalarından biri də qiyabi təhsilalma formasıdır və onun ləğv edilməsi barədə məsələ müzakirəyə çıxarılmayıb”.
Eyni zamanda nazirlik distant təhsilə keçidin bu gün mümkün ola bilməməsi səbəblərini də açıqlayıb.
““Təhsil haqqında” Azərbaycan Respublikasının Qanununa əsasən təhsilalma formalarından biri də distant təhsildir. Lakin tədrisin distant formada təşkilinin mexanizmi yaradılmadığından respublikanın ali təhsil müəssisələrində distant təhsilalma forması tətbiq edilməyib”.
Aytən ƏLİYEVA
