Gənc fəal Bəxtiyar Hacıyev Facebook profilində prezidentliyə namizədlərin ödənişli təşviqatının aparılması üçün Mərkəzi Seçki Komissiyasına (MSK) müraciət etsə də, onun təklifi əqbul olunmamışdı. B.Hacıyev MSK-ya yenidən müraciət edəcək.
O, məsələ ilə bağlı Modern.az-a bildirib:
“MSK-nın cavabı ilə tanışam. Orada “yox” sözü yoxdur. MSK namizdələrin təbliğat, təşviqat işləri ilə məşğul olacaq qurumların adlarını göstərib. Həmin siyahıda televiziyalar, dövri nəşrlər göstərilir. MSK deyir ki, bu məsələdə sosial şəbəkə istifadəçiləri sərbəstdirlər. Onlar MSK-ya məlumat vermədən də bu prosesdə vətəndaş kimi iştirak edə bilərlər. Mənim müraciətimin məqsədi hansısa namizdin öz səhifəmdə təbliğatı deyildi. Məqsədim MSK və namizədlərin sosial şəbəkəni də dövri nəşr kimi saymaları idi. Dəfələrlə qeyd etmişəm, ki, elə qəzetlər var ki, 100 nüsxəsi satılır, ən çox oxunan xəbəri 50-60 dəfə oxunur. Amma 10-15 min dəfə oxunan sosial şəbəkə səhifəsi kütləvi informasiya vasitəsi sayılmalıdır yoxsa yox. Həmin müraciət də bu məsələnin üzərində idi. MSK-dan icazə istəmirdim. Mənim sualımın yeganə vurğusu da bu idi ki, hansısa Facebook səhifəsini kütlənvi informasiya vasitəsi saymaq olar?”.
Bəxtiyar Hacvıyev onu da bildirib ki, MSK-ya fərdi müraciət edəcək. Onun sözlərinə görə, MSK şirkətlərin təşviqat işində iştirakının mümkünsüz olduğunu desə də o, namizədlərin təbliğatını aparmaq üçün vətəndaş kimi yenidən MSK-ya müraciət edəcək.
“MSK-nın cavabında mənim elektron poçtla və bir şirkət adından müraciət etdiyimi bildiriblər. Onların dediyinə görə, şirkətlər təşviqat işlərində iştirak edə bilməzlər. Amma mən bir vətəndaş kimi müraciət edəcəyəm. Hansısa qəzetin redaktoru olduğu kimi, Facebook səhifəsinin də sahibi var. Həmin səhifənin sahibi olaraq namizədlərin təbliğat, təşviqatını aparmaq üçün mənə şərait yaradılsın”-deyə Bəxtiyar hacıyev bildirib.
Bəxtiyar Hacıyev öz profil səhifəsində prezidentliyə namizədlərin təbliğatını aparmaq üçün MSK-ya müraciətinə Komissiyanın cavabı belə olub.
“Onun seçki subyekti kimi təşviqata qoşulmaq hüququ yoxdur”.
Gültəkin ƏLƏSGƏR
