“Qara Dəniz İqtisadi Əməkdaşlıq Təşkilatı (QDİƏT) Parlament Assambleyasının İqtisadiyyat komitəsinin Gəncədə keçiriləcək iclasında dünyada iqlimin dəyişməsi və onun Qara dəniz bölgəsinə təsiri müzakirə olunacaq”.
Bu sözləri
Modern.az-a açıqlamasında Qara Dəniz Ölkələri Parlament Assambleyasında Azərbaycan nümayəndə heyətinin üzvü, millət vəkili Asəf Hacıyev deyib. O qeyd edib ki, daha sonra məsələnin Baş Assambleyada müzakirəsi üçün tövsiyyə olunacaq.
A.Hacıyev iclasda müzakirə olunacaq digər məsələnin təşkilati məsələlər olduğunu bildirib. “Komitə sədrinin səlahiyyətlərinin vaxtı başa çatır. Ona görə komitəyə yeni sədr seçiləcək. İqtisadiyyat komitəsi olduğu üçün burada Dağlıq Qarabağ münaqişəsi tipli məsələlərin müzakirəsi qadağandır. Amma Azərbaycan nümayəndə heyəti hər zaman öz çıxışlarında dolayı yolla o məsələlərlə toxunur, Dağlıq Qarabağda baş verənlər dünya ictimaiyyətinə çatdırılır”.
Təşkilata 12 dövlətin daxil olduğunu deyən deputat vurğulayıb ki, Gəncədə keçiriləcək iclasda 10 dövlətin nümayəndələrinin iştirakı gözlənilir.
“İclasa 40-a yaxın deputat gələcək. İclasın Gəncədə keçirilməsi bir daha göstərir ki, Azərbaycanda inkişaf nəinki paytaxt Bakıda, Azərbaycanın regionlarında da böyük sürətlə gedir və bu baxımdan 10-a yaxın dövlətin nümayəndələrinin bura gəlməsi bunu bir daha təsdiq edir”.
Qeyd edək ki, Qara Dəniz İqtisadi Əməkdaşlıq Təşkilatı (QDİƏT) Parlament Assambleyasının İqtisadiyyat komitəsinin iclası sentyabrın 3-4-də Gəncədə keçiriləcək.
Aytən ƏLİYEVA
