Azərbaycan SSR-in ilk dövlət başçısı Nəriman Nərimanovun nəşinin Azərbaycana gətirilməsi ilə bağlı məsələ gündəmə gəlib. Modern.az bu haqda Azərbaycan kommunistlərinin və sol qüvvələri təmsil edən ASDP-nin də mövqeyini öyrənib.
Kommunist Partiyasının sədri Rauf Qurbanov bildirib ki, o, Nərimanovun nəşinin Azərbaycana gətirilib Fəxri Xiyabanda basdırılmasının əleyhinədir.
“Nərimanovun nəşi Kremlin divarlarındadır. Məzarın oradan çıxarılıb ölkəmizə gətirilməsi o qədər də məqsədə uyğun deyil”– deyən partiya rəsmisi əlavə edib ki, Nərimanovun Kremldə basdırılması Azərbaycanın sovetlər dönəmində hansı səviyyədə olmasının göstəricisidir.
“Bir azərbaycanlı olaraq fəxr eləməyə dəyər ki, Nərimanov kimi bir şəxsiyyət Kremlin divarlarında öz yerini tapıb”.
R.Qurbanovun sözlərinə görə Fəxri Xiyabanda kifayət qədər tanınmış insanların məzarı olduğundan N.Nərimanovun nəşinin Azərbaycana gətirilməsini istəmir. O, Sovet dövrünün dahi şəxsiyyətləri ilə Nərimanovun qəbrinin bir sırada olmasını daha əhəmiyyətli sayır.
ASDP sədri Araz Əlizadə isə öz həmkarının dediklərinin tam əksini söyləyib. “Nərimanovun məzarı Azərbaycanda olsa, daha yaxşı olar. Nərimanov bizim xalqın fəxridir. Xalqımızı onun xatirəsini həmişə əziz tutmalıdır. Ona görə qəbri Azərbaycanda olsa, daha çox insan onu tanıyar”.
Aqşin Kərimov
