Əkrəm Əylisli mətbuata qadağa qoydu
“Daş yuxular” romanı ilə böyük qalmaqala səbəb olan yazıçı Əkrəm Əylislinin ölkənin ziyalı elitası ilə əlaqəni kəsdiyi haqda xəbər vermişdik. Vaxtilə Ziyalılar Forumunun əsas iştirakçılarından olan Əkrəm Əylislinin məlum olaylardan sonra ziyalı dostları ilə yolları ayrılıb. Hətta Ə.Əylisli mətbuat nümayəndələrinin saysız-hesabsız müraciətlərinə baxmayaraq bu haqda bir kəlmə belə danışmaq istəmədiyini, bu mövzuların onun üçün geridə qaldığını bildirib.
Biz də öz növbəmizdə Əkrəm Əylisli ilə əlaqə saxlayaraq professor Cəmil Həsənlinin prezidentliyə namizədliyi barədə münasibət öyrənməyə çalışdıq.
Bir neçə dəfə zəngdən sonra nəhayət Əkrəm Əylisli telefona cavab verdi. Ə.Əylisli sualımızın nə barədə olduğunu biləndən sonra “mən bu haqda nə danışmaq istəyirəm, nə də fikir bildirmək istəyirəm”-deyə reaksiya verib.
Yazıçı buna səbəb kimi əlində işlərinin çox olduğunu deyib. Əylisli həmçinin barəsində qərəzli məlumatlar yayıldığını əsas gətirərək bundan sonra mətbuata danışmaq niyyətində olmadığını vurğulayıb.
Anar RÜSTƏMOV
