Türkiyədə çalışan azərbaycanlı jurnalist Könül Şamilqızının sosial şəbəkədə yaydığı məlumata görə, bu il Bakı Dövlət Universitetinin Hüquq fakültəsinə daxil olan övladı Ülkər Qazax rayonunda Təhsil şöbəsi müdirinin, deputat Əhməd Vəliyevin və digər yetkililərin də iştirakıyla keçirilən toplantıda aşağılanıb, incidilib.
Jurnalist bildirib: “Qazax rayonu Daş Salahlı kənd 2 saylı məktəbin direktoru Ulduz Mancanov qızıma yaxınlaşaraq hər kəsin içində “Sən niyə yalan danışırsan, 685 bal toplamamısan” deyə onu ittiham edib. Qızımın israrla “dəqiqləşdirə bilərsiniz” deməyinə baxmayaraq, ittihamlar davam etdirilib və “elə olsa, prezident təqaüdü alardın, sən yalan danışırsan” deyə aşağılanıb”.
K.Şamilqızı olayla bağlı təhsil naziri Mikayıl Cabbarova sual ünvanlayıb: “Bu aşağılamaların və ayrı-seçkiliyin səbəbini anlamaqda çətinlik çəkirəm. Və hörmətli təhsil nazirinə sual edirəm: Bu ayrı-seçkiliyin səbəbi mənim müxalif jurnalist, qızımdan aşağı nəticələr göstərməsinə rəğmən qızıl medal alan şagirdin valideyni dövlət məmuru (Maliyyə İdarəsində çalışdığı bildirilir) olmağıdırmı? Bu aşağılıq davranışın səbəbi mənim sizin təmsil etdiyiniz hakimiyyətə müxalif olmağımdırmı?”.
Modern.az saytı məsələ ilə bağlı Təhsil Nazirliyindən münasibət öyrənməyə çalışıb.
Təhsil Nazirliyinin şöbə müdiri Aydın Əhmədov Modern.az-a açıqlamasında bildirib ki, o, faktla əlaqədar araşdırma aparıb. A.Əhmədov deyib ki, Qazax rayon Təhsil şöbəsinin təşkil etdiyi iclasda rayonun bütün yüksək bal toplayan məzunları iştirak edib və onlara hədiyyə verilib.
“Mənə dedilər ki, orada 15 abituriyent olub və həmin xanım jurnalistin qızı da tədbirdə iştirak edib. Onlara hədiyyələr verilib. Burada başa düşmürəm hansı incidilmək və ayrı-seçkilikdən söhbət gedir. Orada direktor Ulduz Mancanovun nə etdiyini bilmirəm, amma mən Təhsil şöbəsi ilə əlaqə saxladım və bildirdilər ki, həmin qıza da digərləri kimi hədiyyələr verilib” - deyə Aydın Əhmədov vurğulayıb.
Aytən ƏLİYEVA
