Bu gün Müsavat Partiyası Divanının növbəti toplantısı keçirilib. İclasda verilən qərarların icrası, görülən işlər müzakirə olunduqdan sonra partiyadaxili məsələlərə baxılıb. Partiyanın mətbuat xidmətindən Modern.az-a verilən məlumata görə, iclasda Milli Şuranın vahid namizədi Cəmil Həsənlinin Mərkəzi Seçki Qərargahının fəaliyyəti, imzatoplama kampaniyasının gedişi müzakirə edilib. İlkin nəticələr müsbət qiymətləndirilib və prosesin daha da gücləndirilməsi məqsədəuyğun hesab edilib.
Divan “EL” hərəkatına qarşı qaldırılmış uydurma ittihamlarla bağlı hərəkatın təmsilçiləri Eldar Namazov, Köçəri Nağıbəyli və Eldəniz Quliyevin dindirilməyə çağırılmasını seçki kampaniyası dövründə müxalifət düşərgəsinə təzyiqlərin artırılması kimi qəbul edir və qanunsuz hərəkətlərə son verilməsini tələb edir. Toplantıda həmçinin Milli Şuranın üzvü Yaşar Cəfərliyə qarşı da təzyiqlərin durdurulmasını tələb edilib.
Divan seçki kampaniyası dövründə rəsmi təşviqatın başlanmasına xeyli qalan müddətdə namizədlərin birinin televiziya və dövlət qəzetlərində təbliğatının aparılmasının Seçki Məcəlləsinə zidd olduğunu bildirib və Mərkəzi Seçki Komissiyasına bu məsələyə diqqətli olmağı tövsiyə edib.
Divanda Azərbaycanın da iştirak etdiyi Şərq Tərəfdaşlıq Proqramına daxil olan ölkələrdən dördünün (Ukrayna, Moldova, Gürcüstan, Ermənistan) artıq Ümumdünya Ticarət Təşkilatına üzvü olduğu, bu il noyabrın sonunda isə Avropa İttifaqı ilə assosiativ saziş imzalayacağını, Azərbaycanın isə Belarusla yanaşı Şərq Tərəfdaşlıq Proqramının hazırladığı yekun sənədi imzalamayacağı təəssüf hissi ilə qeyd edilib.
Yığıncaqda Fövqəladə Hallar Nazirliyinin və Dövlət Neft Şirkətinin təhlükəsizlik xidmətinin yarıtmaz işinin nəticəsində “Bulla” yatağında başlayan yanğının indiyədək davam etdiyi, qəza nəticəsində gündəlik yanan qazın Şahdəniz yatağında gündəlik istehsal olunan qazın miqdarından artıq olduğu qeyd olunub. Divan qəzanın nəticələrinin aradan qaldırılması üçün müvafiq qurumları təcili tədbirlər görməyə çağırıb.
Sonda cari məsələlərə baxılıb.
A.RÜSTƏMOV
