Bir müddət öncə uşaqkən Xocalı soyqırımı zamanı hər iki valideynini itirmiş gənclər Parlament Jurnalistləri Birliyinin təşəbbüsü ilə ilk dəfə bir araya gətirildi. Onların millət vəkilləri, hökumət nümayəndələri ilə görüşü təşkil edildi. Nəticə etibarilə dövlət qurumlarının rəhbərləri uşaq dünyası “güllələnmiş” bu insanların Bakıda yaşayış yerilə təmin olunacağına söz verdilər. Amma üstündən 8 ay keçməsinə baxmayaraq verilən vədlər gerçəkləşməyib.
Modern.az saytına açıqlamalarında hər iki valideynini itirmiş Xocalı sakinləri bildiriblər ki, bir neçə dəfə müxtəlif instansiyalardan onlara zəng gəlib. Bununla da məsələ bitib: “Biz bu görüşlərə çox ümidli idik. Xocalı soyqırımından 20 il sonra sonra bizi bir araya gətirdilər. Biri-birimizi orada tanıdıq. Bu diqqət və qayğının tez bir zamanda yaralarımıza məlhəm olacağını düşünmüşdük. Amma çox təəssüf ki, verilən vədlərə hələ də əməl olunmayıb. Nə vaxt harasa müraciət etsək, “gözləyin, biz də sizin problemlərinizin həlli üçün çalışırıq” deyirlər. Yenə də ümidimizi itirmirik, bizlərə veriləcək olan şad xəbəri səbirsizliklə gözləyirik. Amma onu da bilirik ki, bütün dünyanı bizə versələr də sınmış, parçalanmış həyatımız düzəlməyəcək”.
Qeyd edək ki, bir müddət əvvəl Əmək və Əhalinin Sosial Müdafiə Nazirliyi tərəfindən uşaqkən Xocalı soyqırımı zamanı hər iki valideynini itirmiş 25 gənc arasından mənzilə ehtiyacı olanlar müəyyənləşdirilərək bu haqda “Dövlətqaçqınkom”a müraciət edilib. Həmin siyahıda 14 nəfərin adı var: Novruzov Nigar Sabir qızı; Hüseynov Ədalət Hüseyn oğlu; Hüseynov Yaşar Hüseyn oğlu; Hüseynova Tahirə Hüseyn qızı; Hüseynov Bəhlul Hüseyn oğlu; Hüseynov Murad Tofiq oğlu; Hüseynova Yasəmən Tofiq qızı; Hüseynova Əfsanə Tofiq qızı; Xəlilova Həmail Tahir qızı; Əmirova Xəzəngül Təvəkkül qızı; Məhərrəmov Natiq Vaqif oğlu; Məhərrəmov Namiq Vaqif oğlu; Məhərrəmova Vüsalə Vaqif qızı; Kərimova Gülnar Ziyafət qızı.
Pərvin ARZUQIZI
