“Bu informasiya həqiqətə uyğun olmayan iddialara söykənir”. Bunu Modern.az saytına açıqlamasında keçmiş Prezident Katibliyinin rəhbəri, Milli Şuranın Mərkəzi İcra Aparatının rəhbəri Eldar Namazov onda gizli sənədlərin olması ilə bağlı KİV-də yayılan məlumatlara münasibət bildirərkən deyib. O qeyd edib ki, rəsmi vəzifəsindən istefa verməsindən 14 il vaxt keçdiyindən məsələnin indi gündəmə gəlməsi başa düşülən deyil. “Bu illər ərzində belə bir şey olsaydı 14 dəfə mənə qarşı cinayət işi açılardı”-deyən mərhum prezident Heydər Əliyevin keçmiş köməkçisi bildirib ki, bu cür məqalələrin yazılması kimlərinsə özlərinin siğortalamasına hesablanıb. “Ancaq bunlar heç biri xasiyyətimə və dünyagörüşümə uyğun deyil. Ona görə də bu cür söhbətlərin heç bir əsası yoxdur”-deyə E. Namazov vurğulayıb.
Xatırladaq ki, “Yeni Müsavat” qəzetinə sızan məlumatlara görə sabiq dövlət məmuru E. Namazova qarşı hakimiyyətin qəzəbinin əsas səbəbi məxfi sənədlərdir. İddiaya görə E. Namazov 1999-cu ilin oktyabrında vəzifəsindən istefa verərkən özü ilə gizli dosyelər aparıb. Məqalədə həmçinin E. Namazovun prokurorluqda dindirilməsinin də əsas səbəbi məhz həmin konfidensial məlumatlardır. Qeyd edək ki, hakimiyyətdə işlədiyi vaxtda o zamankı prezident Heydər Əliyevin ən yaxınındakı adam olan E.Namazov1999-cu ilin oktyabrında xarici işlər naziri Tofiq Zülfüqarov, dövlət müşaviri Vəfa Quluzadə ilə birgə istefaya gediblər.
Aqşin Kərimov
