Bir ilə yaxındır təmirə dayandırılan “Dərnəgül yolu” kimi tanınan Ziya Bünyadov prospektində nəqliyyatın hərəkəti 2014-cü ildə də məhdudlaşdırılacaq. “Azəryolservis” ASC-nin mətbuat xidməti Pünhan Mürsəliyevin Modern.az-a verdiyi məlumata görə, hazırda həmin prospektdə qovşaqlar tikilir. Həmin qovşaqlar tikiləndən sonra yolun əsaslı təmirinə başlanılacaq.
Qeyd edək ki, yenidənqurma işləri çərçivəsində prospekt üzərində 4 yeni yolötürücü qovşaq tikiləcək. Prospektin eni 60 metrədək artırılacaq. Yolla bağlı əsas problemlərdən biri yolda kanalizasiya sisteminin mövcud olmamasıdır. Yenidənqurma nəticəsində burada həmin sistem yaradılacaq.
Ziya Bünyadov prospekti Bakının ən böyük yollarından biridir. Prospekt metronun “Koroğlu” stansiyasından “20 Yanvar” stansiyasınadək uzanır.
Gültəkin ƏLƏSGƏR
