Azərbaycanda bir neçə ildir ünvanlı sosial yardımlar tətbiq olunur, amma kifayət qədər imkansız ailə bu prosesdən kənarda qalıb. Bunun əsas səbəbi isə bəzi bölgələrdə yerli məmurların sözügedən məsələyə məsuliyyətsiz yanaşmasıdır. Belə olan halda yardımlar ya düzgün təyin olunmur, ya da ünvanına çatmır. Ünvanlı sosial yardım alanların arasında isə məcburi köçkünlərin sayının azlığı müşahidə olunur.
Əmək və Əhalinin Sosial Müdafiəsi Nazirliyinin mətbuat xidmətinin rəhbəri İlham Məmmədov Modern.az-a bildirib ki, ünvanlı sosial yardım insanları kateqoriyalara bölmür, yəni məcburi köçkün, qaçqın, yerli vətəndaş olduğuna görə verilmir. Onun sözlərinə görə, ünvanlı sosial yardım bütün kateqoriyalardan olan aztəminatlı insanlara verilir. Nazirlik rəsmisi həmin yardımın ailənin ümumi gəliri adambaşına düşən ehtiyac meyarının cəmindən az olduğu təqdirdə verildiyini deyir. Ünvanlı sosial yardım alanlardan 43,5 faizi (52 653 ailə) tərkibində 3 və daha çox uşağı olan ailələrdir. “Məcburi köçkünlərə yardım, yəni çörəkpulu və sairə kimi müavinətlər verildiyindən ünvanlı sosial yardım alanlar arasında məcburi köçkünlərin sayı azlıq təşkil edir. Ünvanlı sosial yardım alanların təqribən 10%-ini məcburi köçkünlər təşkil edir”.
Gültəkin ƏLƏSGƏR
