“Sayca 36-cı illik “Meeting de Rimini” beynəlxalq forumu siyasi deyil, turizm forumudur. Və orada Azərbaycandan nümayəndə iştirak etmədiyi üçün qondarma Dağlıq Qarabağla bağlı ayrıca stendin qoyulmasından xəbərsiz olmuşuq”.
Bu sözləri Modern.az-a açıqlamasında Azərbaycan-İtaliya parlamentlərarası əlaqələr üzrə işçi qrupunun rəhbəri Azər Kərimli deyib.
Xatırladaq ki, söhbət avqustun 17-dən 23-dək İtaliyanın Rimini şəhərində keçirilən forumda Ermənistanla yanaşı, qondarma “Dağlıq Qarabağ Respublikası“ da təmsil olunub. Tədbirdə qondarma qurumu baş naziri Ara Arutunyan təmsil edib. Fotojurnalist Qraçiello Viqo forumda Ermənistan və Dağlıq Qarabağla bağlı çəkdiyi şəkillərin sərgisini keçirib. Sərgini İtaliyanın baş naziri Enrik Lettan da ziyarət edib.
Azər Kərimli qeyd edib ki, dünyanın məşhur turizm sərgiləri London, Parisdə keçirilir ki, burada da bu tip hallarla rastlaşarkən Mədəniyyət və Turizm Nazirliyi hərəkətə keçir.
“Bu hallarda qondarma “Dağlıq Qarabağ Respublikası”na aid stend yığışdırılır, ya da onlar Ermənistanın stendinə keçirlər. İtaliyada önəmli tədbir olmadığından Azərbaycan orada iştirak etməyib”.
Deputat bildirib ki, İtaliya-Azərbaycan parlamentlərarası dostluq qrupunun rəhbərinə bu haqda sorğu yazacaq.
Aytən ƏLİYEVA
