Milli Şuranın sədri Rüstəm İbrahimbəyov Mərkəzi Seçki Komissiyasının onun prezidentliyə namizədliyini təsdiqləmədikdən sonra qərardan apelyasiya şikayəti verilib. Avqustun 30-da Bakı Apelyasiya Məhkəməsi Rüstəm İbrahimbəyovun Mərkəzi Seçki Komissiyasının qərarından şikayətinə “yox” cavabı verib. Modern.az-a danışan vəkil Fuad Ağayev bildirib ki, kasasiya şikayət Apelyasiya Məhkəməsinə artıq təqdim olunub. “Apelyasiya şikayətinin təmin olunmamasından kasasiya şikayəti vermişik. Şikayəti dünən göndərmişəm. Müraciət artıq Apelyasiya Məhkəməsinə də çatıb. Məhkəmə protokolunda çox ciddi qüsurlar olduğuna görə ona dair qeydlər də vermişəm. Bir sıra sənədlərin, o cümlədən məhkəmə protokolunun surətinin mənə verilməsini tələb etmişəm. Hələ ki, bir xəbər yoxdur”.
Vəkil onu da bildirib ki, MSK Rüstəm İbrahimbəyovun ikili vətəndaşlığı olduğunu iddia edir. Halbuki ikili vətəndaşlıq Rüstəm İbrahimbəyov iki dövlətin vətəndaşı olması anlamı vermir.
“Bu o deməkdir ki, Azərbaycan Respublikası bu şəxsin həm Azərbaycan, həm də başqa dövlətin vətəndaşı olmasını tanıyır və bununla bağlı dövlətlərarası müqavilə var”, – deyə Fuad Ağayev bildirib. Xatırladaq ki, Rusiya Federasiyasının Azərbaycandakı səfiri Vladimir Daroxin MSK-nın sorğusuna cavab olaraq bildirib ki, R. İbrahimbəyov 28 noyabr 1991-ci il tarixdən Rusiyanın vətəndaşıdır. Bundan başqa R. İbrahimbəyovun 74 il ərzində yalnız 1163 gün Azərbaycanda yaşadığı açıqlanıb. MSK bu faktları əsas gətirərək, açıq səsvermə yolu ilə R. İbrahimbəyovun namizədliyinin təsdiq olunmaması haqda qərar verib.
Gültəkin ƏLƏSGƏR
