Təhsil naziri Mikayıl Cabbarovun daha bir idarə rəisini işdən çıxardığı haqda xəbər yayılıb. Musavat.com-un verdiyi məlumata görə, adı bir neçə aydır mətbuatda hallanan Təhsil Nazirliyinin Ali və orta ixtisas təhsili idarəsinin rəisi İlham Mustafayev vəzifəsindən azad edilib. Onun sentyabrın 3-də işdən çıxarıldığı bildirilir.
İ.Mustafayev 21 ildir ki, həmin vəzifəni tuturdu. İ.Mustafayev eks-təhsil naziri Misir Mərdanovun kadrı sayılırdı...
Təhsil Nazirliyinin Ali və orta ixtisas təhsili şöbəsinin müdiri İlham Mustafayevin özü isə Modern.az-a açıqlamasında işdən çıxarılması haqda xəbərin təsdiqlənə biləcəyini gizlətməyib. O, bildirib ki, hələlik iş başındadır. “Hələlik iş başındayam. Amma ola bilər ki, mətbuatda çıxmağımla bağlı gedən informasiya doğrulanar və bir-iki günə məni də vəzifəmdən azad edərlər”.
***
Təhsil Nazirliyində ciddi struktur və kadr dəyişikliyi edilib. Təhsil naziri Mikayıl Cabbarovun əmri ilə ali və orta ixtisas təhsili şöbəsinin müdiri İlham Mustafayev və elm şöbəsinin müdiri Gültəkin Hüseynova vəzifələrindən azad ediliblər. APA-ya açıqlamasında faktı təsdiqləyən İlham Mustafayev bildirib ki, o nazirlikdə digər vəzifəyə təyin edilib. Onun sözlərinə görə, Təhsil Nazirliyindən elm və ali və orta ixtisas təhsili şöbəsi birləşdirilərək vahid bir böyük şöbə yaradılıb: “Mənə isə həmin şöbənin müdir müavini vəzifəsi təklif edilib və mən də razılığımı bildirmişəm. Bundan sonra Təhsil Nazirliyində işimi yeni yaradılan şöbənin müdir müavini kimi davam etdirəcəyəm. Təhsil Nazirliyinin elm şöbəsinin müdiri Gültəkin Hüseynova isə yeni yaradılan şöbəyə sədrlik edəcək”.
Aytən Əliyeva
