“Azərbaycanda fəaliyyət göstərən bütün kitabxanalar, 4 respublika əhəmiyyətli kitabxana istisna olmaqla hamısı yerli büdcələrdən (rayon büdcəsindən) maliyyələşir”. Bu sözləri Modern.az-a açıqlamasında Mədəniyyət və Turizm Nazirliyinin kitabxana sektorunun müdiri Lətifə Məmmədova deyib. O, qeyd edib ki, mərkəzləşmiş kitabxananın xərclər smetasına əsasən, kitabxanalar kitab ala və ya qəzet, jurnallar üçün abunə yazıla bilərlər.
“Bundan başqa, nazirliyin vəsaiti hesabına kitablar alınır və bölgü əsasında bütün kitabxanalara əvəzsiz paylanılır. Bu kitablar ayrı-ayrı müəlliflərdən, müxtəlif nəşriyyatlardan alınır. Bundan əlavə, nazirliyin vəsaiti hesabına 500-1000 nüsxə tirajla kitablar nəşr olunur. Bu kitablar işıq üzü görəndən sonra bölgü əsasında kitabxanalar arasında paylanır”.
L.Məmmədova bildirib ki, kitabxanalar üçün alınan kitablar 1 manatdan başlayır və ən bahalısı 7-8 manatdır. “Həmin kitablar da çox şəkilli və keyfiyyətli çap olur. Amma adətən kitabların alınması üçün orta rəqəm 2-3 manatdır”.
Sektor müdiri nazirliyə yeni kitabxanaların yaradılması ilə bağlı təklifin gəldiyini də bildirib. “İsmayıllı rayonunun icra başçısı Mədəniyyət və Turizm Nazirliyinə müraciət etmişdi ki, hər kənddə bir kitabxana olsun. Ona tövsiyə etdik ki, bələdiyyə kitabxanaları açılsın. Yəqin ki, ilk bələdiyyə kitabxanaları məhz İsmayıllıda açılacaq. Nazirlik olaraq onları lazımi avadanlıq və kitabla təmin edəcəyik”. Kitabxana sektorunun müdiri L. Məmmədova bu gün elektron kitabların olduqca az olduğunu bildirib.
“CD və DVD-lərdə olan kitablar kitabxanalarda çox azdır. Mədəniyyət və Turizm Nazirliyi olaraq Dövlət Proqramına əsasən “Nizami” layihəsini həyata keçirdik və o layihə ilə elektron formada bir çox kitab buraxdıq. Amma bu, kağız kitabları tam əvəz etmir. Elektron kataloq, elektron kitabxana prosesi davam edir. Prezident İlham Əliyevin bununla bağlı iki sərəncamı var. Onların hər ikisində qeyd olunur ki, Azərbaycan ədəbiyyatının virtual kitabxanası yaradılmalıdır. Mədəniyyət və Turizm Nazirliyi olaraq bu istiqamətdə müəyyən işlər aparmışıq. 42 şəhər və rayonun kitabxanalarında elektron kataloq artıq yaradılıb. Bu kitabxanalarda 7/ 24 elektron kataloqlar işləyir”.
L. Məmmədova respublika əhəmiyyətli kitabxanalarda problemlərin olduğunu deyib. “4 sahəvi respublika əhəmiyyətli kitabxana var. Respublika Elmi-Pedaqoji Kitabxana Təhsil Nazirliyinin, Respublika Elmi Kənd Təsərrüfatı Kitabxanası Kənd Təsərrüfatı Nazirliyinin, Respublika Elmi Texniki Kitabxana Standartlaşdırma, Metrologiya və Patent üzrə Dövlət Komitəsinin tabeliyindədir. Bu 3 kitabxanada elektron kataloq yaradılmayıb. Onların çox zəngin fondları var. Əfsus ki, o resursları dünyaya çıxarda bilmirik. Respublika Elmi-Tibb Kitabxanasında isə digərlərindən fərqli olaraq elektron kataloqun hazırlanması istiqamətində iş gedir”.
Aytən ƏLİYEVA
