Müdafiə Nazirliyi mətbuat xidməti dünən "Zabitlər evi"nin qarşısında bir qrup valideynin müdafiə nazirinin müavini, general-leytenant Çingiz Məmmədovun maşınını əhatəyə alaraq etiraz etməsinə münasibət bildirib.
Mətbuat xidmətinin rəisi Eldar Sabiroğlu
Modern.az-a bildirib ki, həmin aksiyanın səbəbi aydın deyil.
”Hansısa bir əsas olmadan bu cür vasitələrlə təsir etmək qəbul edilə bilməz. Hazırda ölkənin bütün təhsil sistemində olduğu kimi, hərbi təhsil sahəsində də yeniliklər və islahatlar aparılır. Bu mənada əvvəlki illərdən fərqli olaraq artıq neçə ildir ki, Müdafiə Nazirliyinin hərbi təhsil müəssisələrinə qəbul TQDK tərəfindən test üsulu ilə həyata keçirilir. Bundan başlıca məqsəd savadlı gəncləri hərbi məktəblərə cəlb etməkdir. Bunun nəyi pisdir ki, valideynlər belə etiraz edirlər. Lakin onlar övladlarının imtahansız və ya çox aşağı bal toplamalarına baxmayaraq köhnə qayda ilə hərbi məktəblərə qəbul olunmalarını istəyirlər. Biz bunu yolverilməz hesab etməklə həmin valideynlərə hərbi təhsil müəssisələrində tətbiq edilən yeni standartlara hörmətlə yanaşmalarını tövsiyyə edirik”.
Xatırladaq ki, dünən saat 18:00 radələrində Dənizkənarı Milli Park yaxınlığında yerləşən “Zabitlər evi”nin qarşısında bir qrup vətəndaş yolu bağlayaraq, müdafiə nazirinin müavini, general-leytenant Çingiz Məmmədovun maşınına hücum çəkiblər. Yol bir müddət bağlı qalıb.
Press24.az-ın məlumatına görə, narazı insanlar avtomobilin şüşələrini yumruqlayaraq, nazir müavini ilə görüş tələb ediblər. Lakin Çingiz Məmmədovu müşayiət edən zabitlər valideynlərin israrına məhəl qoymadan, sürücüyə avtomobili vətəndaşların üzərinə sürmək göstərişi veriblər. Nəticədə bir neçə nəfər müxtəlif bədən xəsarəti alıb. Onlar nazir müavinin ünvanına kəskin ifadələr işlətməyə başlayıblar. Vətəndaşlar zabitlərin avtomobili onların üstünə sürmək əmrini nazir müavinin göstərişi olmadan verdiklərinə inanmadıqlarını dilə gətiriblər.
Qeyd edək ki, nazir müavini ilə görüş tələb edən valideynləri narahat edən məsələ onların övladlarının Ali Hərbi Məktəbə imtahansız qəbul edilməmələri ilə bağlıdır.
Belə ki, sözügdən məzunlar C. Naxçıvanski adına Hərbi Liseyə 2010-cu ildə TQDK tərəfindən keçirilən imtahanlarda tələb olunan balı toplayaraq qəbul olublar. Üç il liseydə təhsil alaraq, hərbi biliklərə yiyələniblər. Lakin indi onlara bildirilib ki, əvvəlki illərdən fərqli olaraq, bu il liseyi bitirənlər Ali Hərbi Məktəbə daxil olmaq üçün təkrar TQDK tərəfindən keçirilən imtahanda iştirak etməlidirlər. Valideynlər tələb edirlər ki, hərbi liseyi bitirmiş məzunlar əvvəlki illərdə olduğu kimi imtahansız Ali Hərbi Məktəbə qəbul edilsinlər.
Modern.az
