Milli Şurada bir müddət öncə vahid namizəd problemi həll olunsa da, qurumda növbəti dəfə yeni gərginlik yaranıb. Xəbər verdiyimiz kimi, Milli Şuranın dünənki iclasına “El” Hərəkatı üzvləri qatılmayıb. Bu vəziyyət isə Milli Şuranın yeni gərgin müstəviyə qədəm qoymasıdır.
“El” Hərəkatı Ali Məclisinin sədri Eldəniz Quliyev isə Modern.az-a açıqlamasında sessiyada iştirak etməmələrinin səbəbini açıqlayıb. E.Quliyev Milli Şura ilə bağlı narazılıqlarının əsas səbəbini həmin qurumda təmsil olunan bir neçə müxalifət liderinin onları Rusiyaya işləməkdə ittiham etməsi ilə əlaqələndirib. Bundan başqa deyib ki, hakimiyyətdən “El”ə qarşı təzyiqlər olsa da, heç bir partiya onların müdafiəsinə qalxmayıb.
Modern.az saytı məsələ ilə bağlı Müsavat və AXCP-dən də mövqe öyrənib.
Müsavat Partiyasının Məclis sədri Arzu Səmədbəylinin cavabı belə olub: “Biz Divanın toplantısında “El”ə qarşı olan basqını pisləyən bir çağırışla çıxış edib, bəyanat vermişik. Bundan başqa İctimai Palatanın koordinasiya şurasının da bəyanatı olub. Düşünürəm ki, Müsavatla bağlı bu sözlər söylənə bilməz. Çünki həmin basqıları pisləyən, qınayan bəyanatlarımız var”.
E.Quliyevin Rusiya projesi ilə bağlı dediklərinə də Müsavat rəsmisi reaksiya verib. “Mən bu haqda bir kəlmə də eşitməmişəm. Eldəniz bəyin əlində bilgisi varsa, ad çəkməlidir”-deyə A. Səmədbəyli vurğulayıb.
AXCP sədrinin müavini Fuad Qəhrəmanlı bildirib ki, “El”in mövqeyini bölüşmür. “Onlara qarşı olan təzyiqləri AXCP kəskin şəkildə pisləyir. Milli Şuraya daxil olan hər bir kəs “El” Hərəkatına olan təzyiqlərə görə eyni mövqedədir. Fikir ayrılığı və fərqli yanaşmalardan söhbət belə, gedə bilməz”-deyə F.Qəhrəmanlı qeyd edib. Onun sözlərinə görə hakimiyyətinin müxalifətə, demokratik qüvvələrə qarşı təzyiqləri ilə təkcə “El” Hərəkatı üzləşmir.
Aqşin Kərimov
