Modern.az prezidentliyə namizədlərin imzatoplama kampaniyası barədə sorğunu davam edir.
Azərbaycan Demokrat partiyasının sədri Sərdar Cəlaloğlu namizədliyini gec irəli sürdüyündən yalnız 4 min imza toplaya bilib. Onun sözlərinə görə, bölgələrdə fəaliyyət göstərən nümayəndələri topladıqları imzaları Bakıya göndərəcəklər. “300 nəfər səfərbər edilib. İmza toplanılmasında Ümid Partiyası da mənə yaxından kömək edir. Artıq toplanan imzaları MSK saf-çürük edirik. Sentyabrın 8-ə kimi prosesin başa çatacaq”.
Azərbaycan Liberal-Demokrat partiyasının sədri Fuad Əliyev imza toplama kampaniyasının artıq sona çatdığını və imzaların seçki qərargahında yoxlanıldıqdan sonra yaxın günlər ərzində MSK-ya təqdim ediləcəyini bildirib. “Artıq lazım olan 45 min imza toplanıb. Sabah, ya biri gün imzaları MSK-ya təqdim edəcəyik”.
“REAL” hərəkatının Ali Məclis sədri Erkin Qədirli isə hərəkatın namizədi İlqar Məmmədovun imzatoplama kampaniyasının normal getdiyini bildirib. “İmzaların yarısından çoxunu toplamışıq. Düşünürəm ki, bu gedişlə 3-4 günə kompaniyanı bitirəcəyik”.
Vətəndaş və İnkişaf partiyasının sədri Əli Əliyev də imzatoplama kampaniyasının sona yaxınlaşdığını və yoxlamalardan sonra MSK-ya təqdim ediləcəyini bildirdi. “Ekspertlər tərəfindən imza vərəqələri yoxlanılır. Toplanan imzaların sayı 40 mini keçib”. Xatırladaq ki, imzatoplama kampaniyası üçün sentyabrın 9-da başa çatacaq. Hələlik yalnız iki namizədin – İlham Əliyev və İqbal Ağazadənin təqdim etdiyi sənədlər təsdiqlənib.
Vüqar İsmayılov
