“Prezidentliyə namizədliyini irəli sürən Zahid Orucun imzatoplama kampaniyasında ona imza verən seçicilər arasında qonşuları da var”. Bunu mətbuata açıqlamasında Zahid Orucun Seçki Qərargahının rəhbəri Ərəstun Əlioğlu dilə gətirib. Onun dediyinə görə, Z.Oruc təxminən 8 ildir Bakı şəhərinin Səbail rayonunda-Nizami küçəsi 96-da yaşayır və prezidentliyə namizəd kimi ona imza verənlər arasında həmin ünvandakı 76 mənzilli binanın sakinləri də var: “Bizim üçün hər bir kəsin imzası dəyərlidir. Burada heç bir ayrı-seçkilik qoymuruq. Amma insana onun qonşuluğunda yaşayanların da mənəvi dəstək verməsi olduqca önəmlidir və bu, xüsusi məna kəsb edir. Həm də həyat bir növ münasibətlər sistemi üzərində bərqərar olub. Ona görə Zahid müəllimə onunla eyni binada yaşayan insanların imza verməsini çox müsbət addım kimi qiymətləndiririk.
Onu da qeyd edim ki, həmin binada elə də çoxsaylı azərbaycanlı yaşamır. Bu binada olanların, fəaliyyət göstərənlərin xeyli qismi xarici vətəndaşlar və ya başqa ünvanlarda yaşayan insanlardır. Ancaq buna baxmayaraq, Zahid müəllimin qonşuluğunda yaşayan azsaylı azərbaycanlılar onun namizədliyinə simpatik yanaşaraq, məmnuniyyətlə, öz imzalarını veriblər. Odur ki, biz Seçki Qərargahımız adından bir daha onlara öz minnətdarlığımızı bildiririk”.
Modern.az
