Gürcüstanın Baş naziri Bidzina İvanişvili jurnalistlər üçün növbəti ənənəvi mətbuat konfransı keçirib. Baş nazir ölkə əhalisini oktyabrın 27-də keçiriləcək prezident seçkilərində fəal olmağa çağırıb, bununla səmərəli hakimiyyət yaradılmasının mümkün olduğunu qeyd edib. İvanişvili qeyd edib ki, hazırda bütün qüvvələri prezident seçkilərinin demokratik, obyektiv, şəffaf və ədalətli keçirilməsinə yönəltmək lazımdır.
Baş nazir ölkədə siyasi spektrin və hökumətin tam sabitləşdiyi halda siyasətdən gedəcəyini qeyd vurğulayıb.
Sonra Bidzina İvanişvili jurnalistlərin suallarını cavablandırıb. Azərbaycanlı kadrların dövlət strukturlarında təmsil olunmaları ilə əlaqədar suala cavab verən Baş nazir deyib ki, bu yaxınlarda Savalan Mirzəyev milli məsələlər üzrə onun köməkçisi vəzifəsinə təyin olunub. Bu vəzifə nazir müavinindən yüksəkdir. Bidzina İvanişvili köməkçisinin çox böyük funksiyaya malik olduğunu dbəyan edib.
Baş nazir onu da diqqətə çatdırıb ki, kadrlar vəzifələrə milli mənsubiyyətlərinə görə deyil, peşəkarlığına, iş keyfiyyətinə görə təyin olunurlar. Yüksək peşəkarlıq qabiliyyətinə malik Gürcüstan vətəndaşları, milliyyətindən asılı olmayaraq bütün vəzifələri tuta bilərlər.
Torpaq bölgüsündə yol verilmiş haqsızlıqlarla bağlı Baş nazir Bidzina İvanişvili deyib ki, biz hər sahədə olduğu kimi, bu sahədə də ədalətsizliyin aradan qaldırılması üçün təsirli tədbirlər görürük. Proses davam edir, çox böyük ədalətsizliklərə yol verilib, onu bir anda yoluna qoymaq asan deyil.
Modern.az
