Modern.az saytı xəbər verir ki, sentyabrın 4-də Ermənistan silahlı qüvvələrinin atəşkəsi pozması Tovuz rayonunda bir azərbaycanlının yaralanması ilə nəticələnib. Millət vəkili Qənirə Paşayevanın bildirdiyinə görə, hadisə sentyabrın 4-də təxminən saat 18.00 radələrində baş verib. Ermənilər Tovuzun Əlibəyli kənd sakini, 1985-ci il təvəllüdlü Musayev Adil Vəkil oğlunu vurublar və o çiyin nahiyəsinin dəlib keçən güllə yarası ilə xəstəxanaya yerləşdirilib.
”Rayonun baş həkili Paşa Muradov ilə danışdıq. Çox şükür həkimlərimizin yardımı nəticəsində 28 yaşlı Adil Musayevin həyatını xilas etmək mümkün oldu. Bir az əvvəl Adilin özü ilə danışdım. Allaha çox şükür ki, yaxşılaşır və ona keçmiş olsun diləklərimi söylədim. Həkimlərimiz qısa zamanda onun tam sağlamlığına qovuşması üçün əllərindən gələni edəcəklərini dedilər. Beynəlxalq təşkilatlar və onların Bakıdakı ofisləri Ermənistan Silahlı Qüvvələrinin dinc, sivil insanlara qarşı törətdiyi bu cür hadisılərə reaksiya verməlidirlər. Təssüf ki Ermənistanın hər zaman qeyri-insanı addımlarına, hərəkətlərinə reaksiya verməyən təşkilatlardan bunu gözləmək aşırı optimizm olardı. Təssüf ki onlar bu məsələdə obyektivliklərini çoxdan itiriblər”-deyə Q.Paşayeva bildirib.
Modern.az
