“Azərbaycanda kəhrizlərin, bulaqların quruması ilə bağlı fakt aşkarlanmayıb”. Bu sözləri Modern.az-a açıqlamasında Ekologiya və Təbii Sərvətlər Nazirliyinin Ekologiya və təbiəti mühafizə şöbəsinin sektor müdiri Mütəllim Əbdülhəsənov deyib. O, qeyd edib ki, nazirliyin apardığı monitorinqlərdə belə hal müşahidə edilməyib. “Azərbaycan su ehtiyatlarına bulaqların təsiri o qədər də böyük deyil. Yerüstü su ehtiyatlarımız 30,9 milyard kub metrdir ki, bunların da çoxu çaylarda formalaşır. Amma bulaqların quraqlıq illərdə müəyyən qədər azalması olsa da bu ölçü böhranlı səviyyəyə gəlib çatmayıb”.
Nazirlik sözçüsü bildirib ki, kəhriz və bulaqların ölkənin suya ehtiyacı olan kəndlərinə yönəldilməsi və bundan insanların içməli su kimi istifadə etməsini dəstəkləyirlər. “Su təchizatı ilə məşğul olan təşkilatlar Ekologiya və Təbii Sərvətlər Nazirliyinə müraciət edəndə onlara kəhrizlərimiz, bulaqlarımızın, yeraltı sularımızın harada yığılması barədə məlumatlar təqdim edirik və buna uyğun olaraq onlar da su təchizatı sistemlərini qururlar. Istənilən halda təbii bulaqlar əsasən kənd yerlərində, Azərbaycanın əsas dağlıq zonalarında istifadə edilir”.M. Əbdülhəsənov bildirib ki, insanların icazəsiz bulaqlardan borular çəkərək istifadə etməsi yolverilməzdir. “İstənilən su obyekti bələdiyyə, xüsusi və özəl mülkiyyətə verilə bilər. Lakin bunlar müvafiq qurumların razılığı çərçivəsində olmalıdır. Özbaşına bulaqların özbaşına zəbt edilməsi qanunvericiliklə yol verilmir və bu qadağan olunur”.
