Bakıda Diasporla İş üzrə Dövlət Komitəsinin dəstəyi və təşkilatçılığı ilə Nizami Gəncəvi Beynəlxalq Mərkəzinin və Madrid Klubunun ali səviyyəli toplantısı keçirilir.
Trend xəbər verir ki, tədbirdə Latviya, Finlandiya, Niderland, Şri-Lanka və digər ölkələrin keçmiş dövlət və hökumət başçıları, həmçinin bir sıra nüfuzlu beynəlxalq qurumların rəhbərləri iştirak edirlər.
Toplantı iştirakçılarına Azərbaycan Respublikasının Prezidenti İlham Əliyevin salamlarını çatdıran Diasporla İş üzrə Dövlət Komitəsinin sədri Nazim İbrahimovun sözlərinə görə, onların hər biri dövlət başçısının şəxsi qonağıdır.
Komitə sədri qeyd edib ki, toplantının məqsədi "Birgə Cəmiyyətlər 2014" forumuna hazırlıqdır:
"May ayında Bakıda birgə cəmiyyətlərə dair ilk Açıq Cəmiyyət Forumu - I Qafqaz Forumu təşkil olunub. Tədbirdə 60-a yaxın ölkənin sabiq dövlət və hökumət başçıları iştirak edib. Bundan sonra Bakıda analoji tədbirlər tez-tez keçiriləcək. Bu tədbir də gələn ilki 2-ci forumun keçirilməsi üçün hazırlıq xarakteri daşıyır."
Onun sözlərinə görə, Azərbaycan artıq dünyanın fikir mərkəzlərindən birinə çevrilməkdədir:
"Azərbaycan dünyada yeganə ölkədir ki, burada heç zaman antisemitizm halı qeydə alınmayıb. Azərbaycan birgəyaşayışa hörmət edən, tolerant xalqdır. Son günlər islam dövlətlərində baş verən proseslər, bir sıra ölkələrdəki xaos halları fonunda Azərbaycanın stabil, yüksək templə inkişaf etməsi, buradakı toleranlıq Azərbaycanı dünyada çox cəlbedici ölkəyə çevirib. Azərbaycan dünyanın marağına səbəb olub, onun paytaxtı Bakı şəhəri də beynəlxalq bir mərkəzə çevrilməkdədir. Azərbaycanın dünyanın fikir mərkəzlərindən birinə çevriləcəyi artıq göz qabağındadır."
Komitə sədrinin fikrincə, bu tədbir həm Azərbaycana qarşı ikili standartlara cavab olacaq, həm də Azərbaycanın tanıdılması baxımından mühüm rol oynayacaq.
İki gün davam edəcək Yüksək Səviyyədə Görüşün iştirakçıları Cənubi Qafqazda münaqişələr, qadınların cəmiyyətdə aktivliyinin artırılması, mədəniyyətlərarası və dinlərarası dialoq, 2015-ci il Minillik İnkişaf Proqramı kimi əhəmiyyətli mövzuları müzakirə edəcəklər.
Tədbir çərçivəsində Nizami Gəncəvi Beynəlxalq Mərkəzi və Madrid Klubunun İdarə heyətlərinin toplantısının keçirilməsi planlaşdırılır. İclasda Mərkəzin illik hesabatı müzakirə olunacaq və növbəti il üçün fəaliyyət strategiyası müəyyən ediləcək.
Toplantının sonunda BMT-nin Baş katibi Pan Gi Muna və Baş Assambleyaya müraciət olunması planlaşdırılır.
Yüksək Səviyyədə Görüşün sonuncu günü - sentyabrın 6-da toplantının yekunlarına, əldə olunan razılaşmalara dair jurnalistlər üçün mətbuat konfransı keçiriləcək.
Qeyd edək ki, Diasporla İş üzrə Dövlət Komitəsinin dəstəyi ilə reallaşan Yüksək Səviyyədə Görüşün davamı olaraq "Birgə Cəmiyyətlər Forumu 2014" layihəsi çərçivəsində Brisbon (Avstraliya), Afina (Yunanıstan), İsgəndəriyyə (Misir) və Madriddə (İspaniya) toplantıların keçirilməsi nəzərdə tutulub.
Modern.az
