“Qafqazın Tədqiqat Resursları Mərkəz”i (Caucasus Research Resource Centers, CRRC) Cənubi Qafqaz ölkələrində internetin vəziyyəti ilə bağlı hesabat təqdim edib. Modern.az bildirir ki, hesabat Azərbaycan, Ermənistan və Gürcüstanda internetin 2012-ci ilin sonu üçün olan vəziyyəti əks edib.
Hesabatda qeyd olunur ki, Azərbaycanda əhalinin 19%-i həftədə ən azı bir dəfə, yaxud daha çox internetə qoşulur. Bununla yanaşı, azərbaycanlıların 12%-i internetin nə olduğunu bilmir. Hesabatda azərbaycanlı internet istifadəçilərinin 16%-nin xəbərləri internet saytlarından əldə etdiyi göstərilir. İstifadəçilərin yarısı sosial şəbəkələrdə - “Facebook”, “MySpace” və “Odnoklassniki”də qeydiyyatdan keçib. Təşkilat hər üç Cənubi Qafqaz ölkəsində internetdən 18-35 yaşlı gənclərin daha çox istifadə etdiyini bildirir.
Hesabat Ermənistanı Cənubi Qafqazda internet şəbəkəsinin genişliyinə görə lider ölkə sayır. Burada 44% əhali internetdən həftədə heç olmasa bir dəfə istifadə edir. Bu göstərici Gürcüstanda 35%-dir. Ermənistan və Gürcüstan Azərbaycanı bu baxımdan qabaqlayır. Ermənistanda internet haqqında eşitməyən qalmasa da, Gürcüstanda 6% respondent internetin nə olduğunu bilmədiklərini deyib.
Təşkilat internet vasitəsilə xəbər almağa görə ermənilərin yenə də regionda irəlidə olduğunu qeyd edib. Erməni istifadəçilərin 25%-i, gürcülərin isə 22%-i gündəlik xəbərləri internetdən əldə edir. 16%-lik göstərici ilə Azərbaycan bu siyahıda sonuncu yeri tutur. Sosial şəbəkələrdə azərbaycanlı və erməni istifadəçiləri təxminən yarıya qədərdir, gürcülərin böyük əksəriyyəti isə burada qeydiyyatdan keçiblər. Gürcü respondentlərin əksəriyyəti internetdən istifadə olunmamasına səbəb kimi daha çox kompüterləruin yoxluğunu səbəb gətirsələr də, azərbaycanlı və erməni respondentlər daha çox internet şəbəkəsinin olmamasını önə çəkiblər.
Vüqar İsmayılov
