“Yeni Musavat” qəzeti Azərbaycan Liberal Partiyasının sədri Əvəz Temirxanın ittihamlarına cavab verib. Ə. Temirxan qəzetin iqtidar tərəfindən idarə olunduğunu bildirmişdi.
Baş redaktorunun birinci müavini Azər Ayxan Modern.az-a bildirib ki, Əvəz Temirxan kimi psixoloji problemləri və digər ciddi qüsurları olan adamları siyasətdən və müxalifətdən qovmaq lazımdır. Azər Ayxan onu da bildirib ki, Ə. Temirxan qeyri-ciddi adamdır və onun dedikləri də kimsə tərəfindən ciddi qəbul olunmur.“Qaldı ki, iqtidara işləmək məsələsinə. Əvəz Temirxanın lider dediyi Lalə Şövkət Hacıyeva bu rejimin əsas nümayəndələrindən olub. Qiyamçı Surət Hüseynov milli hakimiyyəti silah gücünə devirəndən sonra bu qadın Heydər Əliyevin iqtidarında ən önəmli post tutub.
Əvəz Temirxanın özü isə 1990-cı ilin 20 yanvarında Moskvadan Azərbaycana göndərilmiş müstəntiq qrupunun üzvü kimi milli-azadlıq hərəkatının fəallarını təqib etməklə məşğul olub. Tərcümeyi-halları bu cür ləkəli, keçmişləri utancverici fraqmentlərlə zəngin adamların üstümüzə gəlmələri ən yumşaq ifadəylə həyasızlıqdır. Abırlarına kor olub sussalar yaxşı olardı”, – deyə “Yeni Müsavat” baş redaktorunun birinci müavini qeyd edib.
Gültəkin ƏLƏSGƏR
