“Prezidentliyə namizədliyini irəli sürən Zahid Oruca imza verənlərin çoxu Qarabağ bölgəsindən olan insanlardır”. Bunu mətbuata açıqlamasında Zahid Orucun Seçki Qərargahının rəhbəri Ərəstun Əlioğlu məlumat verib. Onun dediyinə görə, Z.Orucun yığdığı imzaların təxminən 10 faizi-3 mindən çoxu məhz Qarabağ bölgəsindən olan seçicilərin payına düşür.
Ə.Əlioğlu bildirib ki, 25 ildən artıq bir müddət ərzində Azərbaycanın ağrılı problemi olan Dağlıq Qarabağ, ərazi bütövlüyü problemini daha çox çiynində daşıyan bir bölgənin insanlarının verdiyi imzaların çox böyük önəmi və xüsusi mənası var: “Bildiyiniz kimi, Zahid Oruc məhz Qarabağ bölgəsini, konkret olaraq, Bərdə rayonunu parlamentdə təmsil edir. Eyni zamanda, o, Qarabağ bölgəsinin parlamentdəki təmsilçisi kimi namizədliyini irəli sürüb. Zahid Oruc deputat olduğu 13 il ərzində də bu bölgənin insanlarına daha çox qaynayıb-qarışıb, onlardan birinə çevrilib. Bu bölgədən olan insanların problemlərinin həlində yaxından iştirak edib. Qarabağın dağlıq hissəsi və bəzi aran rayonları işğal edildikdən sonra həmin bölgənin insanları-120 mindən artıq məcburi köçkün Bərdəyə pənah gətirib. Bərdə bu gün Qarabağın bir qalası, istehkamıdır, o, həm də Qarabağın mərkəzi, paytaxtı funksiyasını yerinə yetirir. Bu rayonda işğal altında olan 5 rayonumuzun insanı yaşayır və onların problemlərinin həlli daha çox xüsusi yanaşma və həssaslıq tələb edir.
Qeyd edim ki, uzun illər çadır düşərgələrində çox çətin şəraitdə yaşayan bu insanlar üçün hazırda dövlət tərəfindən 12 mərtəbədən ibarət 10 yaşayış binası tikilir və böyük qəsəbə salınır. Bunları deməkdə məqsədim odur ki, Zahid Oruc Bərdənin təmsilçisi kimi həm də məcburi köçkünlərin parlamentdəki təmsilçisi sayıla bilər və bir millət vəkili olaraq da hər zaman çalışır ki, problemlərinin həlli üçün ona pənah gətirən insanlara kömək etsin, aidiyyatı orqanlar vasitəsilə həmin problemlərin həllinə nail olsun.
Çox sevindirici haldır ki, çox zaman da həmin problemlərin həllinə nail ola bilir. Bu baxımdan, Zahid Oruca imza verən insanlar arasında Qarabağ bölgəsindən olan insanların çoxluq təşkil etməsi təsadüfi deyil və digər vətəndaşlarımız kimi, onların da imzaları bizim üçün çox dəyərlidir. Onların bu dəstəklərinə, bu imzalarına görə də hər birinə dərin təşəkkürümüzü, minnətdarlığımızı bildiririk”. Ə.Əlioğlu sonda eyni zamanda deyib ki, Z.Orucun imza vərəqələrinin Mərkəzi Seçki Komissiyası tərəfindən yoxanılması və araşdırılması prosesi də yekunlaşmaq üzrədir.
Modern.az
