Milli Şuranın üzvü, Azərbaycan Liberal Partiyasının (ALP) sədri Əvəz Temirxan bəzi KİV-ləri onun fikrini təhrif etməkdə suçlayıb. Modern.az saytı xəbər verir ki, Ə.Temirxan Lalə Şövkətin Milli Şuradan çıxdığı barədə onun adından yayılan xəbərləri təkzib edib:
“Bəzi KİV-lərdə bizim sözlərimiz kontekstdən çıxarılaraq, xəbər yayılıb ki, guya ALP və onun lideri Lalə Şövkət Milli Şuradan çıxıb. Bu məlumat həqiqətə uyğun deyil. ALP Milli Şurada qalır.
Amma Milli Şura daxilində bəzi intriqaçı qüvvələrin yaratdığı qeyri-sağlam münasibətlərin iştirakçısı olmamaq üçün Lalə Şövkət onun başqa ALP nümayəndəsilə əvəzlənməsi xahişini mənim vasitəmlə qurumun icra aparatının rəhbəri Eldar Namzova çatdırıb”-deyə Ə.Temirxan vurğulayıb.
Daha sonra o fikrini belə davam etdirib:
”Biz düşündük ki, necə edək ki, bu əvəzləmə Milli Şuraya və onun vahid namizədi Cəmil Həsənlinin seçkiqabağə kampaniyasəna zərər vurmasən. Buna görə də bu əvəzləmənin seçkidən sonra həyata keçirilməsini münasib bildik. Təəssüf ki, bu gün Müsavat başqanı İsa Qəmbərin müşavirlərdən biri Lalə Şövkətə qarşı qərəzli açıqlama verib.
Bununla da biz istəmədən bu qalmaqalın iştirakçısına çevrilmişik. Əslində ALP-yə və Lalə Şövkətə qarşi bu "səlib yürüşünün" arxasında məhz Müsavat başqanı İsa Qəmbər durur. ALP Milli Şurada qalır və Cəmil Həsənlinin namizədliyini axıradək müdafiə edəcək”.
A.Qorxmaz
