Bu gün Bakı Dövlət Universitetinin rektoru, akademik Abel Məhərrəmov Dünya Elm və Mədəniyyət Akademiyasının prezidenti, dr. İvo Slausu, Akademiyanın İdarə Heyətinin sədri Garri Ceykobsu qəbul edib. Qonaqlara BDU haqqında məlumat verən rektor, universitetin üzvü olduğu birlik və assosiasiyalardakı fəaliyyətindən, bu qurumlarla əməkdaşlıq çərçivəsində həyata keçirilən birgə qrant və proqramlardan, universitetdə təhsil alan və təhsil almaq istəyində olan xarici tələbələrdən danışıb.
Azərbaycanın klassik universitetində olmaqdan məmnunluğunu ifadə edən Dünya Elm və Mədəniyyət Akademiyasının prezidenti İvo Slausun sözlərindən məlum olub ki, təmsil etdiyi qurum 1969-cu ildən fəaliyyət göstərir və hazırda dünyanın ən nüfuzlu 675 alimindən ibarət üzvü olan elm mərkəzidir. Görüş zamanı qarşılıqlı maraq doğuran məsələlər müzakirə edilib və Bakı Dövlət Universiteti ilə Dünya Elm və Mədəniyyət Akademiyası arasında əlaqələrin yaradılması, müştərək konfrans və simpoziumların keçirilməsi, birgə proqram və layihələr üzərində işlənilməsi qərara alınıb.
BDU-nun Mətbuat və informasiya şöbəsindən
Modern.az-a verilən məlumata görə, sonda qonaqlar Heydər Əliyev muzeyi, tədris, elmi-tədqiqat laboratoriyaları və mərkəzləri ilə tanış olublar.
Modern.az
