Təhsil Nazirliyində narkomanlığın zərəri barədə metodik-tədris vəsaitlərinin hazırlanması və elmi tədqiqat işlərinin genişləndirilməsi aparılacaq. Modern.az xəbər verir ki, bu barədə təhsil nazirinin yeni əmrinə əsasən, “Narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı mübarizəyə dair 2013-2018-ci illər üçün Dövlət Proqramı”nın icrası ilə bağlı təsdiq olunan Tədbirlər Planında qeyd edilib.
Tədbirlər Planında təhsil müəssisələrində narkomanlığa və narkotik vasitələrin insan orqanizminə məhvedici təsiri, törətdiyi sosial bəlalar, erkən müalicənin labüdlüyü, həmçinin narkomanlığın cəmiyyətə və insanların sağlamlığına ziyanı barədə təbliğat aparılması, o cümlədən bu barədə videofilmlərin nümayiş etdirilməsi nəzərdə tutulub. Eyni zamanda, maarifləndirmə tədbirlərinin aparılması məqsədi ilə təlimçilərin hazırlanması, ixtisasartırma və yenidənhazırlanma institutlarında məktəb psixoloqlarının hazırlığı proqramına narkomanlıq probleminə aid mövzuların daxil edilməsi qeyd edilib.Proqrama əsasən, müasir informasiya texnologiyalarının imkanları və elmi nailiyyətlər nəzərə alınmaqla, sağlam həyat tərzinin təbliği və narkomanlığın ziyanı ilə bağlı məlumatları özündə əks etdirən tədris vəsaitləri hazırlanacaq, şagird və tələbələrin antinarkotik dünyagörüşünün formalaşdırılması məqsədi ilə narkotik vasitələrin, psixotrop maddələrin və onların prekursorlarının qanunsuz dövriyyəsinə və narkomanlığa qarşı kütləvi idman yarışları keçiriləcək.
Aytən ƏLİYEVA
