2010-cu ilin yazında Kür daşqınlarının baş verməsinin 3 il, keçən il Qax-Zaqatala zəlzələsinin baş verməsindən isə 1 ildən artıq vaxt keçir. Ötən müddət ərzində hər iki fəlakətin nəticələrinin aradan qaldırılması istiqamətində görülən işlərlə bağlı ümumilikdə 1, 1 milyarddan artıq vəsait xərclənib ki, bu vəsaitin böyük bir hissəsi Fövqəladə Hallar Nazirliyinin xətti ilə xərclənib. “Kür” Vətəndaş Cəmiyyəti Qərargahı bəyan edib ki, apardıqları araşdırmalar göstərir ki, ayrılan vəsaitin həcmi görülən işlərlə müqayisədə çox olsa da, indiyə qədər adı çəkilən nazirlik xərclənən vəsaitlərin müqabilində hansı işlərin görüldüyü barədə cəmiyyətə hər hansı yekun hesabat təqdim etməyib.
”Əksinə yeni yaşayış məntəqələrinin salınması ilə bağlı yerli (Dövlət Neft Fondundan ayrılan vəsaitlər hesabına qaçqınlar və məcburi köçkünlər üçün tikilən evlər) və beynəlxalq təcrübə (Türkiyənin Van şəhərində baş vermiş zəlzələ ilə bağlı yeni şəhərin salınması) göstərir ki, Kür daşqınları, eləcə də Qax- Zaqatala zəlzələsi ilə bağlı dövlət büdcəsindən böyük həcmdə vəsait ayrılsa da, ayrılan vəsaitlərlə görülən işlər adekvat deyil, vəsaitlər səmərəli və şəffaf xərclənməyib. Bu günə qədər FHN- nin xətti ilə fəlakət bögəsində işləyən, dövlət büdcəsinin əhəmiyyətli hissəsinin xərcləndiyi etibar olunan tikinti şirkətlərinin adları, eləcə də bölgədə tikilən evlərin smeta xərcləri, alınan materialların qiyməti və s. barədə dəfələrlə edilən sorğuları FHN cavablandırmır. FHN vətəndaş cəmiyyəti institutları ilə əməkdaşlıqdan qaçaraq daha çox qapalı və qaranlıq fəaliyyətə üstünlük verib. Onların verdiyi informasiya sorğularını və müraciətlərini cavablandırmaqdan boyun qaçıraraq ölkə Konstitusiyasını və qanunvericilik tələblərini pozub”-deyə “Kür” Vətəndaş Cəmiyyəti Qərargahından Modern.az-a verilən məlumatda qeyd olunub.
Bildirilib ki, cari ilin aprel ayında “Kür” Vətəndaş Cəmiyyəti Qərargahı fövqəladə hallar naziri Kəmaləddin Heydərova rəsmi informasiya sorğusu göndərərək, zəlzələ bölgəsində görülmüş işlərlə bağlı bir sıra suallara cavab istəsə də, qarşı tərəf buna əhəmiyyət verməyib.
FHN sorğuda göstərilən sualları cavablandırmaqdan imtina etdiyindən “Kür” Vətəndaş Cəmiyyəti Qərargahı bunu qanunsuz sayaraq məhkəmə iddiası qalıdırıb. Qurum bununla bağlı 1 saylı İnzibati İqtisadi Məhkəməyə müraciət edib. Məhkəmə iddia ərizəsini məhkəmə baxışına qəbul edərək 13 sentyabra ilk prosesi təyin edib.
Modern.az
