Prezidentliyə namizədliyi qeydə alınan şəxslərin sayı 7-yə çatıb. Toplanmış imzalarla bərabər, daşınmaz əmlakı və illik gəlirləri barədə Mərkəzi Seçki Komissiyasına arayış təqdim etmiş Milli Dirçəliş Hərəkatı Partiyasının (MDHP) prezidentliyə namizədi, millət vəkili Fərəc Quliyev Modern.az-a açıqlamasında özəl əmlakı və mülkləri haqqında məlumat verməkdən imtina edib.
BAXCP-nin səlahiyyətli nümayəndəsi Elçin Mirzəbəyli bildirib ki, partiyanın namizədi, millət vəkili Qüdrət Həsənquluyevin adına sənəddə torpaq sahəsi və minik avtomobili qeyd olunub. “Bu sənədlər müvafiq qaydada dövlət reyestrindən çıxarışla MSK-ya təqdim olunub”-deyə E. Mirzəbəyli söyləyib.
Müasir Müsavat Partiyasının prezidentliyə namizədi Hafiz Hacıyevin sözlərinə görə MSK-ya verdiyi arayışda Bakıdakı evini, maşınını qeyd edib. H.Hacıyev avtomobili kreditlə aldığını vurğulayıb: “Hələ krediti verib qurtara bilməmişəm. Hər ay 500-600 manat ödəyirəm”.
H.Hacıyev mobil telefonunu da kreditlə aldığını arayışda qeyd edib.
Aqşin Kərimov
