“ATƏT-in müşahidəçi missiyası dəfələrlə cəbhənin təmas nöqtələrində monitorinqlər aparıb. İndi də gəlib nə qədər istəyirlərsə, monitorinqlər aparsınlar. Mənim də Azərbaycan vətəndaşı, millət vəkili kimi istəyim odur ki, bu işin bir nəticəsi olsun”.
Bunu Modern.az-a Avropa Şurası Parlament Assambleyasında Azərbaycan nümayəndə heyətinin üzvü, deputat Eldar İbrahimov deyib.
Millət vəkilinin sözlərinə görə, artıq Azərbaycan cəmiyyəti də bu monitorinqlərdən, müşahidələrdən bezib.
“Yaxşı olar ki, ATƏT-in Minsk Qrupu Dağlıq Qarabağ problemi ilə əlaqədar olaraq fəaliyyətini gücləndirsin, problemin çözülməsinə köməkliyini göstərsin. Amerikalı həmsədr Azərbaycana gəlib. Ondan çox şey gözləyirik. Ancaq nəticə hələ ki yoxdur. ATƏT-in 56 dövləti Azərbaycan torpaqlarının Ermənistan tərəfindən işğal olunduğunu təsdiqləyib. Ümid edirik ki, bundan sonra da müəyyən irəliləyişlər olacaq və bu monitorinqlər öz nəticəsini göstərəcək”.
Ulduz İBRAHİMOVA
