Mərkəzi Seçki Komissiyasının (MSK) bu gün keçirilən iclasında "Demokratik Qüvvələrin Milli Şurası" seçicilərin təşəbbüs qrupu tərəfindən namizədliyi irəli sürülmüş Cəmil Həsənlinin prezidentliyə namizədliyi qeydə alınıb.
Modern.az xəbər verir ki, bununla da prezidentliyə namizədliyi qeydə alınan şəxslərin sayı 9-ə çatdı.
Xatırladaq ki, 22 nəfər prezidentliyə namizədliklərinin təsdiq olunması üçün seçki sənədlərini MSK-ya təqdim edib. Onlardan bir nəfərinin namizədliyinin təsdiq olunmasından imtina edilib, digər 21 nəfərin isə prezidentliyə namizədliyi təsdiq olunub.
14 namizəd namizədliklərinin qeydə alınması üçün imza vərəqələrini və digər zəruri sənədləri MSK-ya qaytarıb, digər 7 nəfər isə sənədləri MSK-ya qaytarmayıb.
MSK bundan öncə hakim Yeni Azərbaycan Partiyasının sədri, hazırki prezident İlham Əliyevin, Ümid Partiyasının sədri, deputat İqbal Ağazadənin, öz təşəbbüsü ilə namizədliyini irəli sürmüş deputat Zahid Orucun, Bütöv Azərbaycan Xalq Cəbhəsi Partiyasının sədri, depuat Qüdrət Həsənquliyev, Müasir Müsavat Partiyasının sədri Hafiz Hacıyevin, Azərbaycan Sosial Demokrat Partiyasının sədri Araz Əlizadənin və Milli Dirçəliş Hərəkatı Partiyasının sədri, deputat Fərəc Quliyevin prezidentliyə namizədliyini qeydə alıb.
Azərbaycanda prezident seçkiləri 9 oktyabr 2013-cü il tarixində keçiriləcək
Modern.az
